തിരുവനന്തപുരം: മുണ്ടക്കൈ പുനരധിവാസത്തിന്റെ ഭാഗമായുള്ള ടൗണ്‍ഷിപ്പ് പദ്ധതിയുടെ നിര്‍മാണ കരാര്‍ ഊരാളുങ്കല്‍ സൊസൈറ്റിക്ക്. കിഫ്ബിയുടെ കണ്‍സള്‍ട്ടന്‍സിയായ കിഫ്കോണ്‍ ആണു നിര്‍മാണപ്രവൃത്തികളുടെ മേല്‍നോട്ടം വഹിക്കുക. രണ്ട് ടൗണ്‍ഷിപ്പുകളിലായി 1,000 സ്‌ക്വയര്‍ ഫീറ്റുള്ള വീടുകളാണു നിര്‍മിക്കുന്നത്. ഇതിനായി ആകെ 750 കോടി രൂപ ചെലവ് പ്രതീക്ഷിക്കുന്നുണ്ട്. വയനാട് പുനരധിവാസ പദ്ധതിക്ക് മന്ത്രിസഭ അംഗീകാരം നല്‍കിയിട്ടുണ്ട്.
നേരത്തെ, ടൗണ്‍ഷിപ്പിനായി സര്‍ക്കാരിനു ഭൂമി ഏറ്റെടുക്കാമെന്ന് ഹൈക്കോടതി അറിയിച്ചിരുന്നു. ഭൂമി ഏറ്റെടുക്കുന്നതിനെതിരെ എസ്റ്റേറ്റ് ഉടമകളായ എല്‍സ്റ്റണ്‍, ഹാരിസണ്‍സും സമര്‍പ്പിച്ച ഹരജി തള്ളിയായിരുന്നു കോടതി വിധി. ഭൂമി ഏറ്റെടുക്കുമ്പോള്‍ എസ്റ്റേറ്റ് ഉടമകള്‍ക്ക് നഷ്ടപരിഹാരം നല്‍കണമെന്നും ഭൂമി അളന്ന് തിട്ടപ്പെടുത്താന്‍ സര്‍ക്കാരിന് എസ്റ്റേറ്റുകള്‍ സൗകര്യം നല്‍കണമെന്നും ഹൈക്കോടതി സിംഗിള്‍ ബെഞ്ച് ഉത്തരവിട്ടിരുന്നു.
