യൂത്ത് കോണ്ഗ്രസ് ഭാരവാഹി നിയമനത്തിലെ അതൃപ്തി പരസ്യമാക്കി അബിന് വര്ക്കി. ദേശീയ സെക്രട്ടറി സ്ഥാനം ഏറ്റെടുക്കാന് താല്പര്യമില്ലെന്ന് സൂചന. കേരളത്തില് തുടരാന് അനുവദിക്കണമെന്ന് പാര്ട്ടിയോട് വിനയപൂര്വം അഭ്യര്ഥിക്കുമെന്ന് അബിന് വര്ക്കി പറഞ്ഞു. പാര്ട്ടി തീരുമാനം തെറ്റാണെന്ന് പറയില്ല, പാര്ട്ടിയെ പ്രതിസന്ധിയില് ആക്കില്ലെന്നും അബിന് വര്ക്കി കോഴിക്കോട്ട് പറഞ്ഞു. പരിഗണിച്ച ഘടകങ്ങള് വ്യക്തമാക്കേണ്ടത് നേതൃത്വമെന്നും അബിന് വര്ക്കി പറഞ്ഞു.
‘തനിക്ക് മേല്വിലാസം ഉണ്ടാക്കി തന്നത് പാർട്ടിയാണ്. അതിന് കളങ്കം ഉണ്ടാകുന്നത് ഒന്നും ചെയ്യില്ല. വരുന്ന തിരഞ്ഞെടുപ്പുകൾ കോൺഗ്രസിന് പ്രധാനപ്പെട്ടതാണ്. കേരളത്തിൽ പ്രവർത്തനം തുടരാൻ ആണ് ആഗ്രഹിച്ചിരുന്നത്. നേതാക്കളോട് കേരളത്തിൽ തുടരാൻ അവസരം തരണമെന്ന് അഭ്യർഥിക്കുന്നു. അടിയുറച്ച പാർട്ടിയ്ക്ക് വിധേയനായ പ്രവർത്തകനെന്ന നിലയിലാണ് അഭ്യർഥന. കേരളത്തിൽ ഈ സുപ്രധാന സമയത്ത് തുടരാൻ അവസരം തരണം’– അബിന് വര്ക്കി പറഞ്ഞു.
