സാമൂഹിക മാധ്യമങ്ങള്ക്കുള്ള പുതിയ ഡിജിറ്റല് നിയമങ്ങള് പ്രകാരം ഉദ്യോഗസ്ഥരെ നിയമിക്കുന്ന കാര്യത്തില് ട്വിറ്ററിന് കേന്ദ്ര സര്ക്കാര് അന്ത്യശാസനം നല്കി. ഐ.ടി നിയമങ്ങള് പാലിക്കാത്ത പക്ഷം അനന്തരഫലങ്ങള് നേരിടാന് തയ്യാറാകേണ്ടിവരുമെന്ന് കേന്ദ്രം ട്വിറ്ററിനെ അറിയിച്ചു.
”ചട്ടങ്ങള് ഉടനടി പാലിക്കുന്നതിനുള്ള അവസാന അറിയിപ്പ് ട്വിറ്റര് ഇന്കോര്പ്പറേഷന് നല്കിയിട്ടുണ്ട്, ഇത് പാലിക്കുന്നതില് പരാജയപ്പെട്ടാല് ഐടി ആക്റ്റ് 2000ത്തിലെ ലെ 79-ാം വകുപ്പ് പ്രകാരം ലഭ്യമായ ബാധ്യതയില് നിന്നുള്ള ഒഴിവാക്കല് പിന്വലിക്കും. ഇതുകൂടാതെ ഐടി നിയമം, ഇന്ത്യയിലെ മറ്റ് ശിക്ഷാ നിയമങ്ങള് എന്നിവ പ്രകാരമുള്ള നടപടികള് നേരിടേണ്ടി വരും,” മുന്നറിയിപ്പില് കേന്ദ്രം പറയുന്നു.
നേരത്തെ ആര്.എസ്.എസ് തലവന് മോഹന് ഭാഗവതിന്റെയും ഉപരാഷ്ട്രപതി വെങ്കയ്യ നായിഡുവിന്റെയും വ്യക്തിഗത അക്കൗണ്ടില് നിന്നും വെരിഫൈഡ് ബാഡ്ജ് ഒഴിവാക്കിയിരുന്നു. ഇതിനു പിന്നാലെയാണ് കേന്ദ്രത്തിന്റെ മുന്നറിയിപ്പ് വരുന്നത്.
