ഡെറാഡൂൺ: അഞ്ച് വർഷമായി ആദായ നികുതി അടയ്ക്കുന്നവർക്ക് വീട്ടിൽ മിനി ബാർ സജ്ജമാക്കാനുള്ള അനുമതി നൽകാൻ ഉത്തരാഖണ്ഡ് സർക്കാർ. 12,000 രൂപയാണ് ഹോം മിനി ബാറിന് വാർഷിക ഫീസായി അടയേക്കണ്ടത്.താൽപ്പര്യമുള്ളവർക്ക് ജില്ലാ മജിസ്ട്രേറ്റ് ഓഫിസിൽ ഇതിനായുള്ള അപേക്ഷ സമർപ്പിക്കാം. ലൈസൻസ് ലഭിച്ചാൽ ഒൻപത് ലീറ്റർ ഇന്ത്യൻ നിർമിത വിദേശമദ്യം,വൈൻ, 18 ലീറ്റർ വിദേശ മദ്യം, 15.6 ലീറ്റർ ബീയർ എന്നിവ വീട്ടിൽ സൂക്ഷിക്കാം. സ്വന്തം ആവശ്യങ്ങൾക്ക് മാത്രമേ ഉപയോഗിക്കാവൂ എന്ന നിബന്ധനയോടെയാണ് ലൈസൻസ് നൽകുക. ഡ്രൈ ഡേകളിൽ വീട്ടിലെ ബാറും അടച്ചിടണം. 21 വയസിൽ താഴെ പ്രായമുള്ളവരെ ബാറിന്റെ പരിസരത്ത് പ്രവേശിപ്പിക്കരുത് തുടങ്ങിയ നിബന്ധനകളും സർക്കാർ മുന്നോട്ട് വെച്ചിട്ടുണ്ട്. ഹോം ബാർ തുറന്ന് വിൽപ്പന നടത്തിയാലും ശിക്ഷ അനുഭവിക്കേണ്ടിവരും. ലൈസൻസ് ഉളളവരുടെ ഹോം ബാറിന്റെ പ്രവർത്തനംവിശദമായി പരിശോധിച്ച ശേഷമേ പിന്നീട് ലൈസൻസ് പുതുക്കി നൽകുകയുള്ളൂവെന്ന് ഡെറാഡൂൺ ജില്ലാ എക്സൈസ് ഓഫിസർ രാജീവ് ചൗഹാൻ അറിയിച്ചു.
