ഉത്തര്പ്രദേശ് തിരഞ്ഞെടുപ്പിനോട് അനുബന്ധിച്ച് കേരളത്തെ അധിക്ഷേപിക്കുന്ന തരത്തില് യു.പി മുഖ്യമന്ത്രി യോഗി ആദിത്യനാഥ് നടത്തിയ വിവാദ പരാമര്ശത്തിനെതിരെ യുപി കേരളമായാല് മികച്ച വിദ്യാഭ്യാസമുണ്ടാകും, കാശ്മീരായാല് പ്രകൃതി ഭംഗിയുണ്ടാകും, ബംഗാളായാല് മികച്ച സംസ്കാരവുമുണ്ടാകും എന്ന് ട്വിറ്ററില് കുറിച്ചു കൊണ്ട് ചുട്ട മറുപടി നൽകി കോണ്ഗ്രസ് എം.പി ശശി തരൂര് രംഗത്ത്.
ഉത്തര്പ്രദേശിലെ 58 നിയമസഭാ മണ്ഡലങ്ങളില് ഇന്ന് വോട്ടെടുപ്പ് നടക്കുന്നതിന് മുന്നോടിയായി യോഗി നേരത്തേ നടത്തിയ വോട്ടര്മാര്ക്ക് തെറ്റുപറ്റിയാല് യു.പി കാശ്മീരോ കേരളമോ ബംഗാളോ ആയി മാറുമെന്ന പ്രസ്താവനയാണ് വിവാദമായത്. ഭയരഹിതമായ ജീവിതം ഉറപ്പുവരുത്താന് ബി.ജെ.പിക്ക് മാത്രമേ വോട്ട് ചെയ്യാവൂ എന്നും യോഗി പറഞ്ഞു . ഇതിന് പിന്നാലെ കേരളത്തെ അധിക്ഷേപിച്ചതിന്റെ പേരില് നിരവധി പേര് യോഗിക്കെതിരെ വിമര്ശനവുമായി രംഗത്തെത്തിയിരുന്നു.
