ന്യൂഡല്ഹി: അടിയന്തരാവസ്ഥയെ രൂക്ഷമായി വിമര്ശിച്ച് ലേഖനവുമായി ശശി തരൂര്. ഇന്ദിര ഗാന്ധിക്കും, സഞ്ജയ് ഗാന്ധിക്കുമെതിരെ രൂക്ഷ വിമര്ശനവുമായി ശശി തരൂര് രംഗത്ത്. ഇന്ദിര ഗാന്ധിയുടെ കാര്ക്കശ്യം പൊതുജീവിതത്തെ ഭയാനകതയിലേക്ക് നയിച്ചു. രാജ്യത്ത് അച്ചടക്കം കൊണ്ടുവരാന് അടിയന്തരാവസ്ഥയ്ക്കേ കഴിയൂയെന്ന് ഇന്ദിര ശഠിച്ചു. തടങ്കലിലെ പീഡനവും, വിചാരണ കൂടാതെയുള്ള കൊലപാതകങ്ങളും പുറം ലോകം അറിഞ്ഞില്ല. ജുഡീഷ്യറിയും, മാധ്യമങ്ങളും, പ്രതിപക്ഷവും തടവിലായിയെന്നും ലേഖനത്തില് പറയുന്നു.
ഇന്ദിരയുടെ മകന് സഞ്ജയ് ഗാന്ധിയുടെ ചെയ്തികള് കൊടും ക്രൂരതയുടേതായി. അന്നത്തെ സര്ക്കാര് ഈ നടപടികള് ലഘൂകരിച്ചു. അടിയന്തരാവസ്ഥക്ക് ശേഷം നടന്ന തെരഞ്ഞെടുപ്പില് ഇന്ദിര ഗാന്ധിയേയും, അവരുടെ പാര്ട്ടിയേയും പുറത്താക്കി ജനം രോഷം പ്രകടിപ്പിച്ചു. ഇന്നത്തേത് ജനാധിപത്യ ഇന്ത്യയാണെന്നും കൂടുതല് ആത്മവിശ്വാസവും, അഭിവൃദ്ധിയും നേടിയിരിക്കുന്നുവെന്നും തരൂര് ലേഖനത്തില് പറയുന്നു.
