പത്തനംതിട്ട ജില്ലയിലെ കല്ലൂപ്പാറയിലും തുമ്പമണിലും ഗുരുതര പ്രളയസാധ്യത ഉണ്ടെന്ന് കേന്ദ്ര ജല കമ്മീഷന്. ടൗട്ടേ ചുഴലിക്കാറ്റിന്റെ പശ്ചാത്തലത്തില് കേരളത്തില് വലിയ രീതിയില് മഴ പെയ്തിരുന്നു. ഈ സാഹചര്യത്തിലാണ് കേരളത്തിലെ നദികളിലെ സാഹചര്യം കേന്ദ്ര ജല കമ്മീഷന് വിലയിരുത്തിയത്. പത്തനംതിട്ടയില് മണിമല, അച്ചന്കോവില് നദികളിലാണ് പ്രളയസാധ്യയുണ്ടെന്ന് ജല കമ്മീഷന് മുന്നറിയിപ്പ് നല്കിയത്.
കല്ലൂപ്പാറ എന്ന സ്ഥലത്ത് മണിമലയാര് അപകട നിലയ്ക്ക് മുകളിലാണ് ഒഴുകുന്നതെന്ന് ജല കമ്മീഷന് അറിയിച്ചു. അപകട നിലയ്ക്ക് 0.08 മീറ്റര് ഉയരത്തിലാണ് ഇവിടെ വെള്ളം ഒഴുകികൊണ്ടിരിക്കുന്നതെന്ന് ജല കമ്മീഷന് അറിയിച്ചു. അച്ചന്കോവിലാർ തുമ്പമണ് എന്ന പ്രദേശത്തുകൂടി അപകടനിലയ്ക്ക് 0.50 മീറ്റര് മുകളിലാണ് ഒഴുകുന്നതെന്നും ജലകമ്മീഷന് അറിയിച്ചു.
