ന്യൂഡല്ഹി : അഹമ്മദാബാദ് വിമാനത്താവളത്തില് നിന്ന് പറന്നുയര്ന്നതിന് തൊട്ടുപിന്നാലെ എയര് ഇന്ത്യ ഡ്രീംലൈനര് വിമാനം എങ്ങനെ തകര്ന്നുവീണുവെന്നതില് അന്വേഷണം നടക്കുന്നതിനിടെ സീനിയര് പൈലറ്റിനെ സംശയനിഴലിലാക്കി അമേരിക്കന് മാധ്യമമായ വാള്സ്ട്രീറ്റ് ജേര്ണലില് റിപ്പോര്ട്ട്. വിമാനത്തിന്റെ ഇന്ധന നിയന്ത്രണ സ്വിച്ചുകള് (ഫ്യുവല് സ്വിച്ചുകള്) ഓഫ് ചെയ്തത് സീനിയര് പൈലറ്റായ ക്യാപ്റ്റന് സുമിത് സബര്വാള് ആണെന്ന് സംശയിക്കുന്നതായാണ് അന്താരാഷ്ട്ര വാര്ത്താ ഏജന്സിയായ റോയിറ്റേഴ്സിനെ ഉദ്ധരിച്ച് അമേരിക്കന് മാധ്യമമായ വാള്സ്ട്രീറ്റ് ജേര്ണല് റിപ്പോര്ട്ട് ചെയ്യുന്നത്. എന്നാല് എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യൂറോ അമേരിക്കന് മാധ്യമങ്ങളിലെ റിപ്പോര്ട്ടുകളോട് പ്രതികരിച്ചിട്ടില്ല.
എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യൂറോയുടെ പ്രാഥമിക റിപ്പോര്ട്ടിലെ വിവരങ്ങളെ ഉദ്ധരിച്ചാണ് വാള്സ്ട്രീറ്റ് ജേര്ണലും റോയിട്ടേഴ്സും ഉള്പ്പെടെയുള്ള മാധ്യമങ്ങള് വാര്ത്ത റിപ്പോര്ട്ട് ചെയ്യുന്നത്. അപകടത്തില്പ്പെട്ട ബോയിംഗ് 787 വിമാനത്തിന്റെ എഞ്ചിനുകളിലേക്കുള്ള ഇന്ധന നിയന്ത്രണ സ്വിച്ചുകള് ഓഫ് ചെയ്ത നിലയിലായിരുന്നുവെന്ന് എഎഐബി റിപ്പോര്ട്ടിലുണ്ടായിരുന്നു. ഇത് യാന്ത്രികമായി സംഭവിക്കാനുള്ള സാധ്യത കുറവാണെന്നും മനുഷ്യ ഇടപെടല് കൊണ്ടാവാമെന്നും റിപ്പോര്ട്ടില് സൂചിപ്പിച്ചിരുന്നു.
