തൃശൂർ: വളർത്തുനായ റോഡിലേക്കിറങ്ങിയതിനെ തുടർന്ന് പിന്നാലെ പോയ അയൽവാസി സൗമ്യയെ (45) കുത്തിക്കൊലപ്പെടുത്തിയ കേസിൽ പ്രതി പിടിയിൽ. അപ്പാടൻ തോമസ് എന്നയാളാണ് പിടിയിലായത്. തൃശൂർ ക്രിസ്റ്റഫർ നഗറിൽ നടന്ന കൊലപാതകത്തിന് ശേഷം രക്ഷപ്പെടാൻ ശ്രമിച്ച തോമസ് സമീപത്തെ വീട്ടിലെ കിണറ്റിൽ ഇറങ്ങി ഒളിക്കുകയായിരുന്നു. ഒല്ലൂർ പൊലീസും അഗ്നിരക്ഷാസേനയും ചേർന്ന് സാഹസികമായാണ് പ്രതിയെ കിണറ്റിൽ നിന്ന് പുറത്തെടുത്തത്. റോഡിൽ ചോരവാർന്ന് അരമണിക്കൂറോളം കിടന്ന സൗമ്യയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അഞ്ചേരിയിൽ ഓട്ടോ ഡ്രൈവറായ പ്രതിയും സൗമ്യയുടെ കുടുംബവും തമ്മിലുണ്ടായിരുന്ന തർക്കമാണ് കൊലപാതകത്തിൽ കലാശിച്ചത്. കോടതിയിൽ ഹാജരാക്കിയ പ്രതി നിലവിൽ പൊലീസ് നിരീക്ഷണത്തിൽ ചികിത്സയിലാണ്.
