ബെംഗളൂരു: കര്ണാടകയില് ആദ്യഘട്ട സ്ഥാനാര്ഥി പട്ടിക പുറത്തിറക്കാന് ദിവസങ്ങള് മാത്രം ബാക്കിനില്ക്കെ, പ്രതിപക്ഷ നേതാവ് സിദ്ധരാമയ്യയ്ക്ക് വിജയ സാധ്യതയുള്ള മണ്ഡലം കണ്ടെത്താനാകാതെ കോണ്ഗ്രസ് നേതൃത്വം. നേരത്തെ കോലാറില് മത്സരിക്കുമെന്നു പ്രഖ്യാപിച്ചിരുന്ന സിദ്ധരാമയ്യയ്ക്ക് ആ സീറ്റ് നല്കേണ്ടെന്ന് പാര്ട്ടി ദേശീയ നേതൃത്വം തീരുമാനിച്ചതായി സൂചനയുണ്ട്..
ബാഗല്കോട്ട് ജില്ലയിലെ ബദാമിയില് നിന്നുള്ള എംഎല്എയാണ് സിദ്ധരാമയ്യ.മാസങ്ങൾക്ക് മുൻപ്, കോലാറാണ് ഇനിയുള്ള കര്മ മണ്ഡലമെന്ന് അദ്ദേഹം പ്രഖ്യാപിച്ചിരുന്നു. കഴിഞ്ഞ തിരഞ്ഞെടുപ്പില് പാര്ട്ടി സ്ഥാനാര്ഥി മൂന്നാം സ്ഥാനത്തായ കോലാറില് മുതിര്ന്ന നേതാവിനെ ഇറക്കുന്നത് ആത്മഹത്യാപരമെന്നാണു കോണ്ഗ്രസ് ദേശീയ നേതൃത്വത്തിന്റെ വിലയിരുത്തല്.
