ഈരാറ്റുപേട്ട: സംശയം ചോദിച്ച അഞ്ചാം ക്ലാസ് വിദ്യാർത്ഥിയെ അധ്യാപകൻ മർദിച്ചതായി പരാതി. നടക്കൽ കാരക്കാട് എം.എം.യു.എം. യുപി സ്കൂളിലെ വിദ്യാർത്ഥിയും നടക്കൽ സ്വദേശി സക്കീറിന്റെ മകനുമായ മിസ്ബായ്ക്കാണ് (10) മർദനമേറ്റത്. വ്യാഴാഴ്ച വൈകിട്ട് പരീക്ഷാ സമയത്തായിരുന്നു സംഭവം നടന്നത്. സംശയം ചോദിച്ച മിസ്ബായുടെ തോളിൽ അധ്യാപകൻ ശക്തമായി ഇടിക്കുകയായിരുന്നു. വീട്ടിലെത്തിയ കുട്ടിക്ക് വേദന അനുഭവപ്പെട്ടതിനെ തുടർന്ന് ഈരാറ്റുപേട്ടയിലെ സ്വകാര്യ ആശുപത്രിയിൽ പ്രവേശിപ്പിച്ചു. പരിശോധനയിൽ കുട്ടിയുടെ തോൾ എല്ലിന് പൊട്ടലുള്ളതായി കണ്ടെത്തി. ഡോക്ടർമാർ മൂന്നാഴ്ചത്തെ വിശ്രമം നിർദ്ദേശിച്ചിട്ടുണ്ട്. സംഭവത്തിൽ അധ്യാപകൻ സന്തോഷിനെതിരെ പോലീസ് കേസെടുത്ത് അന്വേഷണം ആരംഭിച്ചു.
