കൊച്ചി: നടി സുബി സുരേഷിന്റെ മരണത്തില് ആശുപത്രിയുടെ ഭാഗത്ത് നിന്നും വീഴ്ച സംഭവിച്ചിട്ടില്ലെന്ന് മെഡിക്കല് സൂപ്രണ്ട്. കരള് മാറ്റിവെക്കല് നടപടികളില് കാല താമസം നേരിട്ടില്ല. സുബി ആശുപത്രിയില് എത്തിയത് രോഗം ഗുരുതരമായതോടെയെന്നും സൂപ്രണ്ട് പ്രതികരിച്ചു. കരള് മാറ്റിവെക്കലിന് കാലതാമസമുണ്ടായത് സുബിയുടെ മരണത്തിന് കാരണമായെന്ന തരത്തില് ആരോപണമുയര്ന്നിരുന്നു. ഇതിന് പിന്നാലെയാണ് ആശുപത്രി അധികൃതര് വിശദീകരണവുമായി രംഗത്തെത്തിയത്. കൃത്യമായ നടപടികള് സ്വീകരിച്ചിരുന്നുവെന്നും ദാതാവിനെ കണ്ടുപിടിക്കുന്നത് അടക്കമുള്ള നടപടികള് പൂര്ത്തിയാക്കി, ഇന്ന് അനുമതി ലഭിക്കാനിരിക്കെയാണ് മരണം സംഭവിച്ചതെന്നും ആശുപത്രി സൂപ്രണ്ട് പറഞ്ഞു.
ഇന്ന് രാവിലെയായിരുന്നു സുബി സുരേഷിന്റെ അന്ത്യം. ആലുവ രാജഗിരി ആശുപത്രിയില് ചികിത്സയിലായിരിക്കെയായിരുന്നു അന്ത്യം. 41 വയസായിരുന്നു. സംസ്കാരം നാളെ നടക്കും. രാവിലെ 10 മുതല് വാരാപ്പുഴയില് പൊതുദര്ശനമുണ്ടാകും.
