മഹാരാഷ്ട്ര സര്ക്കാരിന്റെ ഭാവി തുലാസിലാക്കി കൊണ്ട് വിമത നീക്കം. ശിവസേനയ്ക്കുള്ളിലെ വിമത നീക്കത്തെ തുടര്ന്ന് സര്ക്കാരിന്റെ ഭാവി ഇപ്പോള് അനിശ്ചിതത്വത്തിലാണ്. ശിവസേനയിലെ പിളര്പ്പ് തങ്ങള്ക്ക് ഗുണം ചെയ്യുമെന്നാണ് ബിജെപിയുടെ കണക്കുകൂട്ടല്.
വിമത എം എല് എമാര് ഗുവാഹത്തിയിലെ ഹോട്ടലിലെത്തിയിട്ടുണ്ട്. വിമത എംഎല്എമാരെ അര്ധരാത്രിയോടെ ചാര്ട്ടേഡ് വിമാനത്തില് ആണ് അസമിലെ ഗുവാഹത്തിയിലേക്ക് കൊണ്ട് പോയത്. 34 എംഎല്എമാരോടൊപ്പമുള്ള ചിത്രവും ഏക്നാഥ് ഷിന്ഡേ ക്യാമ്പില് നിന്ന് പുറത്ത് വന്നു. 32 ശിവസേന എംഎല്എമാരും രണ്ട് പ്രഹാര് ജനശക്തി എംഎല്എമാരുമാണ് ഷിന്ഡേക്കൊപ്പമുള്ളത്.
തന്റെ ഒപ്പം 40 എംഎല്എമാരുണ്ടെന്ന് ശിവസേന വിമത നേതാവും മന്ത്രിയുമായ ഏക്നാഥ് ഷിന്ഡെ അവകാശപ്പെട്ടു. ശിവസേനയിലെ വിമത എംഎല്എമാരെ കൂടാതെ ഏഴ് സ്വതന്ത്രരും അടക്കം 40 എംഎല്എമാര് ഒപ്പമുണ്ടെന്ന് ഷിന്ഡെ ക്യാമ്പ് അവകാശപ്പെട്ടു.
ശിവസേനയുടെ നിയമസഭാ കക്ഷി നേതൃസ്ഥാനത്തു നിന്നും ഷിന്ഡെയെ നീക്കിയെങ്കിലും അനുനയശ്രമം തുടരുകയാണ്. മുഖ്യമന്ത്രി ഉദ്ധവ് താക്കറെയുടെ അടുത്ത അനുയായി മിലിന്ദ് നര്വേക്കര് സൂറത്തിലെത്തി ഷിന്ഡെയുമായി നേരിട്ടു ചര്ച്ച നടത്തി. മുംബൈയില് ഇന്ന് നിര്ണായക മന്ത്രിസഭായോഗം ചേരും.
