കൊച്ചി: കെ ജെ ഷൈൻ ടീച്ചർക്കെതിരായ അപവാദ പോസ്റ്റുകളിൽ അന്വേഷണം ഊർജിതമാക്കി പൊലീസ്. ഫെയ്സ്ബുക്കിന്റെ മാതൃസ്ഥാപനമായ മെറ്റയ്ക്ക് സൈബർ പോലീസ് വീണ്ടും കത്ത് അയച്ചു. കഴിഞ്ഞ ദിവസം നൽകിയ കത്തിൽ മറുപടി ലഭിക്കാത്തതിനാലാണ് വീണ്ടും കത്തു അയച്ചത്.
അപവാദ പ്രചാരണങ്ങൾ നടത്തിയ അക്കൗണ്ടുകളെ കുറിച്ച് മെറ്റയിൽ നിന്ന് വിവരങ്ങൾ ലഭിക്കുന്ന മുറയ്ക്ക് പോസ്റ്റ് തയ്യാറാക്കിയവർക്കും പ്രചരിപ്പിച്ചവർക്കുമെതിരെ തുടർ നടപടി സ്വീകരിക്കാനാണ് അന്വേഷണസംഘത്തിന്റെ നീക്കം.
സമൂഹമാധ്യമങ്ങളിൽ അപവാദ പോസ്റ്റിട്ട കുന്നംകുളത്തെ യൂത്ത് കോൺഗ്രസ് നേതാവ് വി എസ് സുജിത്തിനെതിരെയുള്ള ഷൈൻ ടീച്ചറുടെ പരാതിയിലും അന്വേഷണം തുടരുന്നു. സ്ത്രീത്വത്തെ അപമാനിച്ചുവെന്ന് ചൂണ്ടിക്കാട്ടി എറണാകുളം റൂറൽ സൈബർ പൊലീസിനാണ് ഇന്നലെ പരാതി നൽകിയത്. പരാതിക്കു പിന്നാലെ സുജിത്ത് ഇന്നലെ പോസ്റ്റ് പിൻവലിച്ചിരുന്നു.
