ആലപ്പുഴ: ആലപ്പുഴ, കോട്ടയം ജില്ലകളിൽ പക്ഷിപ്പനി സ്ഥിരീകരിച്ചു. ഭോപ്പാലിലെ ലാബിൽ നടത്തിയ സാംപിൾ പരിശോധനയിലാണ് രോഗബാധ സ്ഥിരീകരിച്ചതെന്ന് മൃഗസംരക്ഷണ വകുപ്പ് അറിയിച്ചു. ആലപ്പുഴ ജില്ലയിൽ എട്ട് പഞ്ചായത്തുകളിലെ ഓരോ വാർഡുകളിലാണ് രോഗബാധ റിപ്പോർട്ട് ചെയ്തിരിക്കുന്നത്. നെടുമുടി, ചെറുതന, കരുവാറ്റ കാർത്തികപ്പള്ളി, അമ്പലപ്പുഴ തെക്ക്, പുന്നപ്ര തെക്ക്, തകഴി, പുറക്കാട് എന്നീ പഞ്ചായത്തുകളിലാണ് ബാധ കണ്ടെത്തിയത്. നെടുമുടിയിൽ കോഴികളിലും മറ്റ് പ്രദേശങ്ങളിൽ താറാവുകളിലുമാണ് രോഗലക്ഷണങ്ങൾ സ്ഥിരീകരിച്ചത്. കോട്ടയത്ത് മൂന്നു വാർഡുകളിലും കാട, കോഴി എന്നിവയ്ക്ക് രോഗബാധയുണ്ട്. കുറുപ്പന്തറ, മാഞ്ഞൂർ, കല്ലുപുരയ്ക്കൽ, വേളൂർ എന്നീ വാർഡുകളിലാണ് രോഗബാധ. റിപ്പോർട്ടിന്റെ അടിസ്ഥാനത്തിൽ ഇരുജില്ലകളിലും അടിയന്തര നിയന്ത്രണ നടപടികൾ സ്വീകരിക്കാൻ മൃഗസംരക്ഷണ വകുപ്പ് നിർദേശം നൽകി.
