പത്മ പുരസ്കാരം നിരസിച്ച് പ്രശസ്ത ബംഗാളി ഗായിക സന്ധ്യ മുഖര്ജി. പത്മശ്രീ പുരസ്കാരം നല്കുന്നതുമായി ബന്ധപ്പെട്ട് ഗായികയെ കേന്ദ്രസര്ക്കാര് ഉദ്യോഗസ്ഥര് ബന്ധപ്പെട്ടിരുന്നു. എന്നാല് പുരസ്കാരം നിരസിച്ചുവെന്ന് സന്ധ്യ മുഖര്ജിയുടെ മകള് സൗമി സെന്ഗുപ്ത അറിയിച്ചു.ചൊവ്വാഴ്ചയായിരുന്നു റിപബ്ലിക് ദിനവുമായി ബന്ധപ്പെട്ട് പത്മ പുരസ്കാരങ്ങള് പ്രഖ്യാപിച്ചത്
ബംഗാളി സംഗീതരംഗത്ത് പതിറ്റാണ്ടുകളായി നിറസാന്നിധ്യമായി നില്ക്കുന്ന അമ്മയ്ക്ക് 90 വയസ്സായി. ഇപ്പോള് പുരസ്കാരം നല്കുന്നത് അനാദരവാണെന്ന് സൗമി സെന്ഗുപ്ത പറഞ്ഞു.
ഇതിനെ രാഷ്ട്രീയവുമായി കൂട്ടിക്കലര്ത്തരുത്. എന്റെ അമ്മ രാഷ്ട്രീയത്തിന് അതീതയാണ്. അമ്മയ്ക്ക് അനാദരവാണെന്ന് തോന്നിയതുകൊണ്ടാണ് പുരസ്കാരം നിരസിച്ചത്- സൗമി സെന്ഗുപ്ത കൂട്ടിച്ചേര്ത്തു.നേരത്തെ ബുദ്ധദേബ് ഭട്ടാചാര്യയും പുരസ്ക്കാരം നിഷേധിച്ചിരുന്നു താന് പുരസ്കാരം നിരസിക്കുന്നു എന്ന ബുദ്ധദേവ് തന്നെയാണ് അറിയിച്ചത്. പാര്ട്ടിയുമായി തീരുമാനിച്ചാണ് പുരസ്കാരം നിരസിക്കുന്നതെന്നും അദ്ദേഹം വ്യക്തമാക്കി. സീതാറം യെച്ചൂരിയാണ് ബുദ്ധദേവിന്റെ പ്രസ്താവന ട്വിറ്ററിലൂടെ പങ്കുവെച്ചിരുന്നത്.
128 പേര്ക്കാണ് ഇത്തവണ പത്മപുരസ്കാരങ്ങള് സമ്മാനിക്കുന്നത്.
4 പേര്ക്കാണ് രാജ്യത്തെ രണ്ടാമത്തെ ഏറ്റവും വലിയ സിവിലിയന് പുരസ്കാരമായ പത്മവിഭൂഷണ് സമ്മാനിക്കുന്നത്. 17 പേര്ക്ക് പത്മഭൂഷണും 107 പേര്ക്ക് പത്മശ്രീയും സമ്മാനിക്കും.
പുരസ്കാര ജേതാക്കളില് 34 പേര് സ്ത്രീകളും 10 പേര് വിദേശികളുമാണ് (എന്.ആര്.ഐ, പി.ഐ.ഒ, ഒ.സി.ഐ). 13 പേര്ക്ക് മരണാനന്തര ബഹുമതിയായും പുരസ്കാരം സമര്പ്പിക്കും.
ഹെലികോപ്റ്റര് അപകടത്തില് മരണപ്പെട്ട സംയുക്ത സൈനിക മേധാവി ജനറല് ബിപിന് റാവത്ത് പത്മവിഭൂഷണ് പുരസ്ക്കാരത്തിന് അര്ഹനായി. മരണാനന്തര ബഹുമതിയായാണ് റാവത്തിന് പത്മവിഭൂഷന് സമര്പ്പിക്കുന്നത്.
റാവത്തിനെ കൂടാതെ പ്രഭ ആത്രെ, രാധേശ്യാം ഖെംക(മരണാനന്തരം), കല്യാണ് സിങ് (മരണന്തരം) എന്നിവരും പത്മവിഭൂഷണ് പുരസ്ക്കാരത്തിന് അര്ഹനായി.
