ഇന്ത്യൻ നിരീശ്വര വാദി സൊസൈറ്റി പ്രസിഡന്റ് ബൈരി നരേഷിനെതിരെ വീണ്ടും ആക്രമണം. ഹിന്ദു ദൈവങ്ങൾക്കെതിരെ വിവാദ പരാമർശം നടത്തിയതിന് ഒരു കൂട്ടം അയ്യപ്പഭക്തർ തെലങ്കാനയിലെ ഹനുമകൊണ്ട ജില്ലയിലെ ഗോപാൽപൂരിൽ വെച്ച് കാറിൽ നിന്ന് പിടിച്ചിറക്കി മർദ്ദിക്കുകയായിരുന്നു
ലോ കോളേജിലെ പരിപാടിയിൽ പങ്കെടുക്കാൻ പുറപ്പെട്ട നരേഷിന്റെ വാഹനത്തെ ഒരു കൂട്ടർ വളയുകയും പിടിച്ചിറക്കി മർദ്ദിക്കുകയുമായിരുന്നു. പോലീസെത്തി ആക്രമി സംഘത്തെ പിടിച്ച് മാറ്റിയെങ്കിലും പോലീസ് വണ്ടിയിൽ വെച്ചും മർദ്ദനം തുടർന്നു . വലതുപക്ഷ സംഘടനകളാണ് ആക്രമണം നടത്തിയതെന്നാണ് സൂചന.ആക്രമികളെയെല്ലാം അറസ്റ്റ് ചെയ്തതായി പോലീസ് പറഞ്ഞു.
നേരത്തെ ഹിന്ദു ദൈവങ്ങൾക്കെതിരെ വിവാദ പരാമർശം നടത്തിയതിന് ബൈരി നരേഷിനെ പൊലീസ് അറസ്റ്റ് ചെയ്തിരുന്നു. 45 ദിവസത്തോളം ജയിലിൽ കിടന്ന നരേഷ് ഫെബ്രുവരി 16നാണ് പുറത്തിറങ്ങിയത്. ജയിൽ മോചിതനായതിന് പിന്നാലെ വീണ്ടും വിവാദ പ്രസ്താവന നടത്തിയിരുന്നു.
