ഹൈദരാബാദ്: പൊലീസുകാരെ മരിച്ച നിലയില് കണ്ടെത്തി. തെലങ്കാനയിലെ കമ്മാ റെഡ്ഡി ജില്ലയിലെ ബിദിപെട്ട് സ്റ്റേഷനിലെ പൊലീസ് ഉദ്യോഗസ്ഥരെയാണ് മരിച്ച നിലയില് കണ്ടെത്തിയത്. എസ്.ഐ സായ് കുമാര്, വനിതാ കോണ്സ്റ്റബിള് ശ്രുതി, കമ്പ്യൂട്ടര് ഓപ്പറേറ്റര് നിഖില് എന്നിവരാണ് മരിച്ചത്.
കമറെഡ്ഡി ജില്ലയിലെ അഡ്ലൂര് എല്ലാറെഡ്ഡി തടാകത്തില് രാത്രി 12.30 ഓടെയാണ് ശ്രുതിയുടേയും നിഖിലിന്റേയും മൃതദേഹം കണ്ടെത്തിയത്. ഇരുവരും തടാകത്തില് ചാടി മരിച്ചതാണെന്നാണ് പൊലീസ് നിഗമനം. തുടര്ന്ന് നടത്തിയ തെരച്ചിലില് ഇന്ന് രാവിലെ എസ്.ഐയുടെ മൃതദേഹവും കണ്ടെത്തി. കമ്പ്യൂട്ടര് ഓപ്പറേറ്ററായ നിഖിലാണ് സ്റ്റേഷനുകളിലെ ഉപകരണങ്ങള് ശരിയാക്കിയിരുന്നത്. മരണകാരണം വ്യക്തമല്ല.
അതേസമയം കൂട്ട ആത്മഹത്യയാണെന്നാണ് തെലങ്കാനയിലെ പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നത്. സംഭവത്തില് പൊലീസ് കേസെടുത്ത് അന്വേഷണം ആരംഭിച്ചു.
