ശബരിമല സ്വർണ്ണ മോഷണക്കേസിൽ അന്വേഷണം കോൺഗ്രസ് നേതാക്കളിലേക്കും നീങ്ങുന്നു. കേസിൽ ഹൈക്കോടതി സ്വമേധയാ എടുത്ത ഹർജി പരിഗണിച്ച ദേവസ്വം ബെഞ്ച്, ശബരിമല കൊടിമര നിർമ്മാണത്തിൽ പ്രത്യേക അന്വേഷണം നടത്താൻ നിർദ്ദേശിച്ചു. ഒന്നര മണിക്കൂറിലധികം നീണ്ട നടപടിക്രമങ്ങൾക്കൊടുവിൽ, സ്വർണ്ണപ്പാളികളിൽ കൂടുതൽ ശാസ്ത്രീയ പരിശോധന നടത്താൻ കോടതി അനുമതി നൽകി. ഇതുസംബന്ധിച്ച വിശദമായ ഇടക്കാല ഉത്തരവ് ഇന്ന് വൈകിട്ടോടെ പുറപ്പെടുവിക്കും.
ശബരിമല സ്വർണ്ണ മോഷണക്കേസിൽ സ്വർണ്ണത്തിന്റെ കാലപ്പഴക്കം ശാസ്ത്രീയമായി നിർണ്ണയിക്കുന്നതിനായി മുംബൈയിലെ ഭാഭാ അറ്റോമിക് റിസര്ച്ച് സെന്ററിൽ പരിശോധന നടത്തിയേക്കും. ഇതിനായി സ്വർണ്ണപ്പാളികളിൽ നിന്ന് വീണ്ടും സാമ്പിളുകൾ ശേഖരിക്കാൻ ഹൈക്കോടതി അനുമതി നൽകി. ഈ മാസം 12-ന് ശേഖരിക്കുന്ന സാമ്പിളുകൾ വിദഗ്ധ പരിശോധനയ്ക്ക് വിധേയമാക്കുന്നതോടെ സ്വർണ്ണത്തിന്റെ ഗുണനിലവാരത്തിലും അളവിലും വന്ന മാറ്റങ്ങളിൽ കൂടുതൽ കൃത്യത വരുത്താൻ സാധിക്കും.
പ്രത്യേക അന്വേഷണ സംഘം ഇന്ന് ഹൈക്കോടതിയിൽ ഇടക്കാല റിപ്പോർട്ട് സമർപ്പിച്ചിരുന്നു. അന്വേഷണ ഉദ്യോഗസ്ഥൻ നേരിട്ട് ഹാജരായി ഇതുവരെയുള്ള പുരോഗതി കോടതിയെ ബോധിപ്പിച്ചു. കേസ് കൂടുതൽ വാദങ്ങൾക്കായി ഈ മാസം 19-ലേക്ക് മാറ്റി വെച്ചു.
ശബരിമലയിലെ സ്വർണ്ണക്കവർച്ചയുമായി ബന്ധപ്പെട്ട് ലഭിച്ച വിവരങ്ങളുടെ അടിസ്ഥാനത്തിൽ ഹൈക്കോടതി സ്വമേധയാ ഇടപെടുകയായിരുന്നു. കൊടിമര നിർമ്മാണവുമായി ബന്ധപ്പെട്ട ഇടപാടുകളിൽ രാഷ്ട്രീയ നേതാക്കളുടെ പങ്കും ഇപ്പോൾ അന്വേഷണ പരിധിയിൽ വന്നിട്ടുണ്ട്. സ്വർണ്ണപ്പാളികളുടെ സാമ്പിൾ പരിശോധന ഫലം പുറത്തുവരുന്നതോടെ കേസിൽ നിർണ്ണായക വഴിത്തിരിവുണ്ടാകുമെന്നാണ് കരുതപ്പെടുന്നത്
