തിയറ്ററുകളിൽ ചിരിപടർത്തിയ സൂപ്പർഹിറ്റ് ചിത്രം ‘മധുവിധു’ ഒടിടി റിലീസിന് തയ്യാറെടുക്കുന്നു. മെയ് 22 മുതൽ പ്രമുഖ ഒടിടി പ്ലാറ്റ്ഫോമായ സോണി ലിവിലൂടെ ചിത്രം സ്ട്രീമിംഗ് ആരംഭിക്കും. ആഞ്ഞിലമൂട് തറവാട്ടിലെ അമൃത് രാജ് എന്ന അമ്മുവിന്റെ ജീവിതവും വിവാഹത്തെത്തുടർന്നുണ്ടാകുന്ന രസകരമായ സംഭവങ്ങളുമാണ് ചിത്രത്തിന്റെ ഇതിവൃത്തം. അഞ്ചു പുരുഷന്മാർ മാത്രം താമസിക്കുന്ന വീട്ടിലേക്ക് ഒരു പെൺകുട്ടി എത്തുന്നതും തുടർന്നുണ്ടാകുന്ന മാറ്റങ്ങളും ഹാസ്യത്തിൽ ചാലിച്ചാണ് ചിത്രം അവതരിപ്പിച്ചിരിക്കുന്നത്. ഈ വേനൽക്കാലത്ത് കുടുംബപ്രേക്ഷകർ ഇരുകൈയും നീട്ടി സ്വീകരിച്ച ചിത്രമായിരുന്നു ഇത്.
നടി ബിന്ദു പണിക്കരുടെ മകൾ കല്യാണി പണിക്കർ നായികയായി അരങ്ങേറ്റം കുറിച്ച ഈ ചിത്രം വിഷ്ണു അരവിന്ദ് ആണ് സംവിധാനം ചെയ്തിരിക്കുന്നത്. അജിത് വിനായക ഫിലിംസിന്റെ ബാനറിൽ വിനായക അജിത് നിർമ്മിച്ച ചിത്രത്തിൽ ജഗദീഷ്, സായികുമാർ, അസീസ് നെടുമങ്ങാട് തുടങ്ങി വലിയൊരു താരനിര അണിനിരക്കുന്നുണ്ട്. വിവാഹജീവിതത്തിലെ സ്വപ്നങ്ങളും യാഥാർത്ഥ്യങ്ങളും തമ്മിലുള്ള രസകരമായ സംഘർഷങ്ങളാണ് സിനിമയുടെ കാതൽ. തിയറ്ററുകളിൽ മികച്ച വിജയം നേടിയ ചിത്രം ഡിജിറ്റൽ പ്ലാറ്റ്ഫോമിലും വലിയ സ്വീകാര്യത നേടുമെന്നാണ് പ്രതീക്ഷിക്കുന്നത്.
