പാനൂരില് മുസ്ലിം ലീഗ് പ്രവര്ത്തകന് മന്സുൂറിന്റെ കൊലപാതകത്തിന് പിന്നാലെയുണ്ടായ അക്രമ സംഭവങ്ങളുടെ പശ്ചാത്തലത്തില് കണ്ണൂരില് ചേർന്ന സമാധാന യോഗത്തില് നിന്ന് യുഡിഎഫ് ഇറങ്ങിപ്പോയി. സംഭവം നടന്ന് 48 മണിക്കൂര് കഴിഞ്ഞിട്ടും ഒരു പ്രതിയെ മാത്രമാണ് അറസ്റ്റ് ചെയ്തതെന്നും . 10 ലീഗ് പ്രവര്ത്തകരെ സിപിഎം ഓഫീസുകള് ആക്രമിച്ചെന്ന പേരില് അറസ്റ്റ് ചെയ്ത് തല്ലിച്ചതച്ചെന്നും യുഡിഎഫ് നേതാക്കള് വൈകാരികമായി പ്രതികരിച്ചു
ഉമ്മയുടെയും ഉപ്പയുടെയും മുന്നിലിട്ടാണ് 21 വയസ്സുകാരനെ അതിദാരുണമായി കൊലപ്പെടുത്തിയത്. മന്സൂറിന്റെ സഹോദരന് മുഹ്സിന് ആക്രമിക്കപ്പെട്ടിട്ടും ഒരു പ്രതിയെ പിടികൂടി പൊലീസിനെ ഏല്പ്പിച്ചു. അല്ലാതെ ഒരു പ്രതിയെ പോലും പൊലീസ് പിടികൂടിയില്ലെന്ന് യുഡിഎഫ് നേതാക്കള് ആരോപിച്ചു.
മൻസൂറിന്റെ കൊലപാതക കേസില് ഷിനോസിന്റെ അറസ്റ്റാണ് പൊലീസ് രേഖപ്പെടുത്തിയത്. ഡിവൈഎഫ്ഐ പ്രവർത്തകനാണ് ഷിനോസ്. ലക്ഷ്യമിട്ടത് മന്സൂറിനെയല്ല സഹോദരന് മുഹ്സിനെയാണെന്നാണ് ഷിനോസ് പൊലീസിനോട് പറഞ്ഞത്.
