ചവിട്ടിക്കൊന്നിട്ടും പകയടങ്ങാതെ കാട്ടാന വൃദ്ധയുടെ മൃതദേഹത്തെയും ആക്രമിച്ചു. ഒഡീഷയിലെ മയൂര്ഭഞ്ച് ജില്ലയില് 70 വയസ്സുള്ള ഒരു സ്ത്രീയെയാണ് കൊലപ്പെടുത്തിയതിന് ശേഷവും മൃതദേഹവും വെറുതെ വിടാതെ ആന പിടികൂടിയത്. വ്യാഴാഴ്ചയാണു ആദ്യം ആനയുടെ അക്രമമുണ്ടായത്.
വ്യാഴാഴ്ച രാവിലെ റായ്പാല് ഗ്രാമത്തിലെ കുഴല്ക്കിണറില് നിന്ന് വെള്ളം ശേഖരിക്കുന്നതിനിടെയാണ് 70-കാരിയായ മായാ മുര്മുവിനെ് ദല്മ വന്യജീവി സങ്കേതത്തില് നിന്ന് വഴിതെറ്റിവന്ന കാട്ടാന ആക്രമിച്ചത്.
ആന അവരെ നിലത്തിട്ട് ചവിട്ടി. തുടര്ന്ന് ആശുപത്രിയില് എത്തിച്ചെങ്കിലും അവര് മരണത്തിന് കീഴടങ്ങുകയായിരുന്നു.
വൈകിട്ടോടെ മൃതദേഹം സംസ്കരിക്കുന്നതിനിടെ ആന മടങ്ങിയെത്തുകയായിരുന്നു. ചിതയില്നിന്ന് മൃതദേഹം എടുത്തെറിഞ്ഞ കാട്ടാന നിലത്തിട്ട് വീണ്ടും ചവിട്ടി. പിന്നീട് മൃതദേഹം ഉപേക്ഷിച്ച് ആന കാട്ടിലേക്കു മടങ്ങി. മണിക്കൂറുകള്ക്കു ശേഷമാണ് സംസ്കാരച്ചടങ്ങുകള് പൂര്ത്തിയാക്കിയതെന്ന് ദൃക്സാക്ഷി പറഞ്ഞു.
