അൾട്ട് ന്യൂസ് സഹസ്ഥാപകൻ മുഹമ്മദ് സുബൈറിന് സുപ്രീംകോടതി ഇടക്കാല ജാമ്യം അനുവദിച്ചു. അഞ്ച് ദിവസത്തേക്കാണ് കോടതി ജാമ്യം അനുവദിച്ചിട്ടുള്ളത്. സുബൈറിനെതിരെ ഉത്തര്പ്രദേശ് പൊലീസ് രജിസ്റ്റര് ചെയ്ത കേസിലാണ് ജാമ്യം.ദില്ലിക്ക് പുറത്ത് പോകില്ലെന്നും ട്വീറ്റുകൾ നടത്തില്ലെന്നുമുള്ള ഉപാധികളോടെയാണ് സുപ്രീംകോടതി സുബൈറിന് ജാമ്യം അനുവദിച്ചിരിക്കുന്നത്. കേസുമായി ബന്ധപ്പെട്ട ഡിജിറ്റൽ തെളിവുകളിൽ മാറ്റം വരുത്താൻ ശ്രമിക്കരുതെന്ന നിര്ദ്ദേശവും ജാമ്യവ്യവസ്ഥയിൽ കോടതി ഉൾപ്പെടുത്തിയിട്ടുണ്ട്,. എന്നാൽ ദില്ലി പൊലീസ് രജിസ്റ്റര് ചെയ്ത കേസിൽ സുബൈര് ജുഡീഷ്യൽ റിമാൻഡിൽ തുടരും. അതെസമയം ഡൽഹി പോലീസ് രജിസ്റ്റർ ചെയ്ത കേസിൽ നിലവിൽ സുബൈർ ജുഡീഷ്യൽ കസ്റ്റഡിയിൽ ആണെന്ന് ഉത്തർപ്രദേശ് സർക്കാരിന് വേണ്ടി സോളിസിറ്റർ ജനറൽ സുപ്രീംകോടതിയിൽ ചൂണ്ടിക്കാട്ടി. അതിനാൽ ഉത്തർപ്രദേശ് പോലീസ് രജിസ്റ്റർ ചെയ്ത കേസിൽ ജാമ്യം ലഭിച്ചാലും, സുബൈറിനെ മോചിപ്പിക്കാൻ ആകില്ലെന്ന് അദ്ദേഹം വ്യക്തമാക്കി.
