ബെംഗളൂരു: കര്ണാടകയില് സന്ദര്ശനത്തിനായി പ്രധാനമന്ത്രി നരേന്ദ്ര മോദി എത്തുന്നു. മാര്ച്ച് 25ാം തീയതി മോദി കര്ണാടകയില് എത്തും. ചിക്കബല്ലാപുര്, ബെംഗളൂരു, ദാവന്ഗെരെ എന്നിവിടങ്ങളില് സംഘടിപ്പിക്കുന്ന വിവിധ പരിപാടികളില് അദ്ദേഹം പങ്കെടുക്കും. ഈ വര്ഷം ഇത് ഏഴാം തവണയാണ് മോദി കര്ണാടകയില് എത്തുന്നത്.
മാര്ച്ച് 25 ന് രാവിലെ ഹിന്ദുസ്ഥാന് എയറനോട്ടിക്സ് ലിമിറ്റഡ് (എച്ച്എഎല്) വിമാനത്താവളത്തില് പ്രധാനമന്ത്രി എത്തും. തുടര്ന്ന്, ശ്രീ മധുസുദനന് സായ് ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസ് ആന്റ് റിസര്ച്ചിന്റെ ഉദ്ഘാടന കര്മം നിര്വഹിക്കാനായി ചിക്കബല്ലപുരിലേക്ക് ഹെലികോപ്റ്റര് മാര്ഗം പുറപ്പെടും.
ഉച്ചയ്ക്ക് ശേഷം ബെംഗളൂരുവിലേക്ക് തിരിക്കുന്ന മോദി വൈറ്റ്ഫീല്ഡ് മെട്രോ ലൈന് ഉദ്ഘാടനം ചെയ്യും. തുടര്ന്ന്, മെട്രോ ട്രെയിനില് റൈഡ് നടത്തും. ഡല്ഹിയിലേക്ക് പോകാന് ശിവമോഗയിലേക്ക് പോകുന്നതിന് മുമ്പ് ദാവന്ഗെരെയിലേക്ക് തിരിക്കുന്ന മോദി അവിടെവെച്ച് നടക്കുന്ന പൊതുസമ്മേളനത്തില് പങ്കെടുക്കും. ഇതോടെ ഈ വര്ഷം കര്ണാടകയില് വെച്ച് നടക്കുന്ന മോദിയുടെ ഏഴാമത്തെ സന്ദര്ശനം ആയിരിക്കും ഇത്.
