കടുവകളുടെ എണ്ണം എടുക്കാന് പോയ വനിതാ ഫോറസ്റ്റ് ഉദ്യോഗസ്ഥ അടക്കം മൂന്ന് പേരെ കാണാനില്ല. തിരുവനന്തപുരം ബോണക്കാട് ഉള്വനത്തിലേക്ക് പോയ ഉദ്യോഗസ്ഥരെയാണ് കാണാതായത്. പാലോട് റെയ്ഞ്ച് ഓഫീസിലെ വനിതാ ഫോറസ്റ്റര് വിനീത, BF0 രാജേഷ്, വാച്ചര് രാജേഷ് എന്നിവരെയാണ് കാണാതായത്.
കാണാതായവര്ക്കായി തിരച്ചില് തുടരുകയാണ്. ഇന്നലെ രാവിലെയാണ് ബോണക്കാട് ഉള്വനത്തിലെ കടുവകളുടെ എണ്ണം എടുക്കാന് പോയത്. എന്നാല്, ഇന്നലെ വൈകുന്നേരത്തിന് ശേഷം ഇവരെ വയര്ലസ് കമ്യൂണിക്കേഷന് വഴി ബന്ധപ്പെടാന് കഴിഞ്ഞില്ല. തുടര്ന്നാണ് ആര്ആര്ടി അംഗങ്ങളുടക്കം അന്വേഷണം തുടങ്ങിയത്.
കേരള – തമിഴ്നാട് അതിര്ത്തി മേഖല കൂടിയാണ് ബോണക്കാട്. അഗസ്ത്യാര്മലയും ഇവിടെയാണ്. ഡിഎഫ്ഒ ഉള്പ്പെടെയുള്ള ഉദ്യോഗസ്ഥര് സ്ഥലത്ത് എത്തും. പാലോട് ആര്എഫ്ഒ ഓഫീസില് നിന്നുള്ള രണ്ട് സംഘങ്ങള് ബോണക്കാട് ഭാഗത്ത് എത്തിയിട്ടുണ്ട്. ഇവര് തിരച്ചില് ആരംഭിക്കും.
