ന്യൂഡൽഹി: പശ്ചിമ ബംഗാളിലെ വോട്ടർ പട്ടിക പരിഷ്കരണവുമായി ബന്ധപ്പെട്ട തർക്കത്തിൽ പശ്ചിമ ബംഗാൾ മുഖ്യമന്ത്രി മമത ബാനർജിയും സുപ്രീം കോടതിയും തമ്മിൽ നാടകീയമായ കൂടിക്കാഴ്ച. ബുധനാഴ്ച ഉച്ചകഴിഞ്ഞ് ചീഫ് ജസ്റ്റിസ് സൂര്യകാന്തിന്റെ ചേംബറിലെത്തിയ മമത ബാനർജി, വോട്ടർ പട്ടികയിലെ ക്രമക്കേടുകൾക്കെതിരെ തിരഞ്ഞെടുപ്പ് കമ്മീഷനെതിരെ രൂക്ഷമായി ആഞ്ഞടിച്ചു. “അടഞ്ഞ വാതിലുകൾക്ക് പിന്നിൽ നീതി കരയുകയാണ്” എന്ന മമതയുടെ വൈകാരികമായ പരാമർശം കോടതിയിൽ വലിയ ശ്രദ്ധ നേടി.
തന്റെ ഭാഗം വിശദീകരിക്കാൻ വെറും അഞ്ച് മിനിറ്റ് സമയം മാത്രം തേടിയ മുഖ്യമന്ത്രിക്ക്, ചീഫ് ജസ്റ്റിസ് 15 മിനിറ്റ് സമയം അനുവദിച്ചു. തിരഞ്ഞെടുപ്പ് കമ്മീഷൻ തന്റെ പരാതികൾ തുടർച്ചയായി അവഗണിക്കുകയാണെന്നായിരുന്നു മമതയുടെ പ്രധാന ആരോപണം. വോട്ടർ പട്ടികയിലെ ക്രമക്കേടുകൾ ചൂണ്ടിക്കാട്ടി ആറ് തവണ താൻ കമ്മീഷന് കത്തയച്ചിട്ടും ഇതുവരെ ഒരു മറുപടി പോലും ലഭിച്ചിട്ടില്ലെന്നും, എവിടെയും നീതി ലഭിക്കാത്ത സാഹചര്യത്തിലാണ് താൻ സുപ്രീം കോടതിയെ സമീപിച്ചതെന്നും അവർ വാദിച്ചു.
മുഖ്യമന്ത്രി നേരിട്ട് ഹാജരായി ഉന്നയിച്ച പരാതികൾ ഗൗരവതരമാണെന്ന് സുപ്രീം കോടതി നിരീക്ഷിച്ചു. വിഷയത്തിൽ കേന്ദ്ര തിരഞ്ഞെടുപ്പ് കമ്മീഷനോട് വിശദീകരണം തേടിയ കോടതി, അവർക്ക് ഔദ്യോഗികമായി നോട്ടീസ് അയച്ചു. എല്ലാ പ്രശ്നങ്ങൾക്കും നിയമപരമായ പരിഹാരമുണ്ടെന്ന് ഉറപ്പുനൽകിയ കോടതി, കേസിൽ കൂടുതൽ വാദം കേൾക്കുന്നതിനായി അടുത്ത തിങ്കളാഴ്ചത്തേക്ക് മാറ്റിവെച്ചിരിക്കുകയാണ്.
വരാനിരിക്കുന്ന പശ്ചിമ ബംഗാൾ നിയമസഭാ തിരഞ്ഞെടുപ്പിന് മുന്നോടിയായി വോട്ടർ പട്ടികയിൽ വൻതോതിലുള്ള കൃത്രിമം നടക്കുന്നുണ്ടെന്നാണ് തൃണമൂൽ കോൺഗ്രസ് ആരോപിക്കുന്നത്. മുഖ്യമന്ത്രി നേരിട്ട് കോടതിയിലെത്തി വാദങ്ങൾ നിരത്തിയത് ദേശീയ രാഷ്ട്രീയത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്. തിങ്കളാഴ്ച തിരഞ്ഞെടുപ്പ് കമ്മീഷൻ നൽകുന്ന മറുപടി ബംഗാൾ രാഷ്ട്രീയത്തിൽ നിർണ്ണായകമാകും.
