ശിരോമണി അകാലിദള് നേതാവും പഞ്ചാബ് മുന് ഉപമുഖ്യമന്ത്രിയുമായ സുഖ്ബീര് സിങ് ബാദലിന് നേരെ വധശ്രമം. ഖലിസ്താന് അനുകൂല സംഘടനാ അംഗം നാരായണ് സിങ് ചോര്ഹ സുവര്ണക്ഷേത്രത്തിന്റെ കവാടത്തില്വെച്ച് ബാദലിന് നേരെ വെടിയുതിര്ക്കുകയായിരുന്നു. സ്ഥലത്തുണ്ടായിരുന്നവര് ചേര്ന്ന് ഇയാളെ കീഴ്പ്പെടുത്തി.സിഖുകാരുടെ പരമോന്നത സംഘടനയായ അകാല് തഖ്ത് വിധിച്ച ശിക്ഷയുടെ ഭാഗമായി സുവര്ണക്ഷേത്രത്തിന്റെ കവാടത്തിന് മുന്നില് വീല്ചെയറില് കുന്തവുമായി കാവലിരുന്ന് വരികയായിരുന്നു ബാദല്. സുവര്ണക്ഷേത്രം അടക്കമുള്ള ഗുരുദ്വാരകളിലെ അടുക്കളയും ശുചിമുറികളും വൃത്തിയാക്കണം തുടങ്ങിവയായിരുന്നു ശിക്ഷയായി വിധിച്ചത്. രണ്ടുദിവസം കാവല് നില്ക്കണം, കഴുത്തില് പ്ലക്കാഡ് ധരിക്കണം, കൈയില് കുന്തം കരുതണം. കൂടാതെ ഒരുമണിക്കൂര് കീര്ത്തനങ്ങളും ആലപിക്കണം തുടങ്ങിയ ശിക്ഷകളായിരുന്നു അകാല് തഖ്ത് ബാദലിനുമേല് ചുമത്തിയത്.
2007- 2017 കാലത്തെ അകാലിദള് ഭരണത്തിലുണ്ടായ സര്ക്കാറിന്റെയും പാര്ട്ടിയുടെയും മതപരമായ തെറ്റുകളെ മുന്നിര്ത്തിയാണ് ബാദലിനെ ശിക്ഷിച്ചത്. സിഖ്മത നിയമപീഠം തെറ്റുകാരനെന്ന് വിധിച്ചതിനുപിന്നാലെ സുഖ്ബീര് സിങ് ബാദല് ശിരോമണി അകാലിദള് അധ്യക്ഷസ്ഥാനം രാജിവെച്ചിരുന്നു.
