കുന്ദമംഗലം : കുടുംബ ബന്ധങ്ങൾ ശിഥിലമായിക്കൊണ്ടിരിക്കുന്ന കാലഘട്ടത്തില് കുടുംബ സംഗമങ്ങള്ക്ക് പ്രസക്തി കാണിച്ചുകൊണ്ട് നടുവിലശ്ശേരി കുടുംബ സംഗമം നടത്തി. കുടുംബ സംഗമങ്ങള്ക്ക് പ്രസക്തിയേറെയാണെന്നും കുടുംബ ബന്ധങ്ങള് ഊഷ്മളമാക്കുവാന് പരസ്പര വീട്ടു വീഴ്ച ചെയ്യണമെന്നും മൂപ്പൈനാട് ഗ്രാമപഞ്ചായത്ത് പ്രസിഡന്റ് എ.കെ. റഫീഖ് പറഞ്ഞു. നടുവിലശ്ശേരി കുടുംബ സംഗമം മേപ്പാടി റിപ്പൺ ഹെറിറ്റേജ് ബംഗ്ളാവിൽ വെച്ച് ഉദ്ഘാടനം ചെയ്യുകയായിരുന്നു അദ്ദേഹം. പി.ഒ. ത്വാഹിർ അധ്യക്ഷത വഹിച്ചു. മേപ്പാടി മസ്ജിദുൽ മനാർ ഖത്തീബും പ്രഭാഷകനുമായ അയ്യൂബ് ഖാൻ തലക്കൽ മുഖ്യപ്രഭാഷണം നടത്തി. കുടുബത്തിലെ ഏറ്റവും മുതിർന്ന അംഗം ആമിന ഉമ്മയെ മൂപ്പൈനാട് ഗ്രാമപഞ്ചായത്ത് പ്രസിഡന്റ് എ.കെ. റഫീഖ് പൊന്നാട അണിയിച്ച് ആദരിച്ചു. കുടുംബാംഗങ്ങളായ കുട്ടികളുടെയും മുതിർന്നവരുടെയും വിവിധയിനം കലാകായിക മത്സരങ്ങൾ അരങ്ങേറി. മൂപ്പൈനാട് ഗ്രാമപഞ്ചായത്ത് പ്രസിഡന്റ് എ.കെ. റഫീഖ്, അയ്യൂബ് ഖാൻ തലക്കൽ എന്നിവർക്ക് കുടുംബസംഗമം രക്ഷാധികാരികളായ എൻ. റഷീദ്, എൻ. ലുഖ്മാൻ എന്നിവർ ഉപഹാരം നൽകി. കുടുംബത്തിലെ മുതിർന്നവർക്ക് മെമെന്റോയും വിവിധ മത്സരങ്ങളിൽ പങ്കെടുത്ത് വിജയിച്ചവർക്ക് സമ്മാനങ്ങളും വിതരണം ചെയ്തു. സ്വാഗതസംഘം കൺവീനർ എൻ. ഇല്യാസ്, എൻ. ബഷീർ, മൈമൂന നരിക്കുനി, മുനീറ മായനാട്, എൻ. സാദിഖ്, റുബീന ബഷീർ, നിഹാൽ, ആദിൽ, അൻഹാർ എന്നിവർ നേതൃത്വം നൽകി. പ്രോഗ്രാം കോ-ഓർഡിനേറ്റർ എൻ. ദാനിഷ് സ്വാഗതവും റഹീമ ഷെറിൻ നന്ദിയും പറഞ്ഞു.
