കൊട്ടാരക്കരയിലെ ഡോ. വന്ദന ദാസിന്റെ മരണത്തില് ആഞ്ഞടിച്ച യുവ ഡോക്ടറാണ് റുവൈസ്. അന്ന് സുരക്ഷാ പ്രശനങ്ങള് ചൂണ്ടിക്കാട്ടി അധികൃതര്ക്കെതിരെ സംസാരിച്ച യുവഡോക്ടറാണ് ഇന്ന് 150 പവനും 15 ഏക്കറും ബി.എം.ഡബ്യൂ. കാറും സ്ത്രീധനമായി ചോദിച്ച് ഷഹന എന്ന വനിതാ ഡോക്ടറെ മരണത്തിലേക്ക് തള്ളിവിട്ടത്.
അതേസമയം മെഡിക്കല് കോളജ് സര്ജറി വിഭാഗത്തിലെ പിജി വിദ്യാര്ഥിനി ഡോക്ടര് ഷഹന ജീവനൊടുക്കിയ സംഭവത്തില് പൊലീസ് കസ്റ്റഡിയിലെടുത്ത സുഹൃത്തും സഹഡോക്ടറുമായ ഡോ.ഇ.എ.റുവൈസിന്റെ മൊബൈല് ഫോണിലെ മെസേജുകള് ഡിലീറ്റ് ചെയ്ത നിലയില്. ഡോ. ഷഹനയ്ക്ക് അയച്ച മെസേജുകളാണ് ഡിലീറ്റ് ചെയ്തിരിക്കുന്നത്. പൊലീസ് ഫോണ് പിടിച്ചെടുത്ത് നടത്തിയ പരിശോധനയിലാണ് ഇക്കാര്യം വ്യക്തമായത്. ഫോണ് വിശദമായ സൈബര് പരിശോധനയ്ക്ക് അയയ്ക്കുമെന്ന് പൊലീസ് വ്യക്തമാക്കി.
