ദുബായില് മരിച്ച നിലയില് കണ്ടെത്തിയ വ്ളോഗര് റിഫ മെഹ്നുവിന്റെ മരണം കൊലപാതകമാണെന്ന് സംശയം. യുവതിയുടെ കഴുത്തില് ആഴത്തില് പരിക്കേറ്റതിന്റെ പാടുകള് ഉണ്ടെന്നാണ് പ്രാഥമിക പോസ്റ്റ്മോര്ട്ടം റിപ്പോര്ട്ടില് പറയുന്നത്. രണ്ട് ദിവസത്തിനകം വിശദമായ പോസ്റ്റ്മോര്ട്ടം റിപ്പോര്ട്ട് ലഭിക്കും.
റിഫയുടെ മൃതദേഹം അഴുകിയിട്ടില്ലാത്തതിനാല് മൃതദേഹം കബറിടത്തില്നിന്ന് പുറത്ത് എടുത്ത് പരിശോധിച്ചപ്പോള്തന്നെ കഴുത്തിലെ പാടുകള് ശ്രദ്ധയില്പ്പെട്ടിരുന്നു. ഇതില് വിശദമായ പരിശോധന ആവശ്യമുള്ളതിനാലാണ് മൃതദേഹം പോസ്റ്റ്മോര്ട്ടത്തിനായി കോഴിക്കോട് മെഡിക്കല് കോളേജ് ആശുപത്രി മോര്ച്ചറിയിലേക്ക് മാറ്റിയത്.
ആന്തരികാവയവങ്ങള് രാസപരിശോധനയ്ക്കും അയച്ചിട്ടുണ്ട്. വിശദമായ പോസ്റ്റ്മോര്ട്ടം റിപ്പോര്ട്ട് ലഭിച്ചതിന് ശേഷം ആവശ്യമെങ്കില് അന്വേഷണം ദുബായിലേക്കും വ്യാപിപ്പിച്ചേക്കുമെന്നാണ് പൊലീസ് നല്കുന്ന സൂചന.
മാര്ച്ച് ഒന്നിനാണ് റിഫയെ ദുബയ് ജാഫിലിയയിലെ ഫ്ളാറ്റില് ആത്മഹത്യ ചെയ്ത നിലയില് കണ്ടെത്തിയത്. മാര്ച്ച് നാലിന് മൃതദേഹം റിഫയുടെ സ്വദേശമായ പാവണ്ടൂരിലെത്തിച്ച് കബറടക്കി.
