കരുവന്നൂര് ബാങ്കിലെ നിക്ഷേപകര്ക്ക് പണം തിരികെ നല്കുമെന്ന് സര്ക്കാര് ഹൈക്കോടതിയില്. ബാങ്കിന്റെ ആസ്തികള് പണയം വച്ച് 50 കോടിയോളം സമാഹരിക്കുമെന്നും കേരളാ ബാങ്കില് നിന്ന് വായ്പയെടുത്ത് ബാധ്യത തീര്ക്കുമെന്നും സര്ക്കാര് അറിയിച്ചു.
മുന്ഗണനാക്രമം നിശ്ചയിക്കാന് സര്ക്കാര് 12 ദിവസത്തെ സമയം ആവശ്യപ്പെട്ടു. സഹകരണ വകുപ്പ് മന്ത്രിയുടെ നേതൃത്വത്തില് ഉന്നതാധികാര സമിതി ചേര്ന്ന് പരിഹാര മാര്ഗ്ഗങ്ങള് ചര്ച്ച ചെയ്തുവെന്നും സര്ക്കാര് കോടതിയെ അറിയിച്ചു. ഹര്ജികള് രണ്ടാഴ്ച കഴിഞ്ഞ് പരിഗണിക്കാനായി മാറ്റി.
രണ്ടാഴ്ചയ്ക്ക് ശേഷം കേസ് പരിഗണിക്കുമ്പോള് എത്ര പണം തിരികെ എത്തിയെന്നും ചിലവ് എത്ര എന്നതും കോടതിയെ അറിയിക്കണമെന്നും നിര്ദ്ദേശിച്ചു. പണം അത്യാവശ്യമുള്ളവര് ബാങ്കിനോട് രേഖാമൂലം ആവശ്യപ്പെടണമെന്നും അത്യാവശ്യക്കാര്ക്ക് പണം നല്കിയതിന്റെ രേഖകള് ഹാജരാക്കണമെന്നും കോടതി നിര്ദ്ദേശിച്ചിട്ടുണ്ട്.
