തിരുവനന്തപുരം: കിളിമാനൂരിലെ ക്ഷേത്രത്തില് പാചകവാതകം ചോര്ന്ന് പൊട്ടിത്തെറിച്ചുണ്ടായ അപകടത്തില് പൊള്ളലേറ്റ മേല്ശാന്തി മരിച്ചു. കിളിമാനൂര് പുതിയകാവ് ഭഗവതി ക്ഷേത്രത്തിലെ മേല്ശാന്തി ചിറയിന്കീഴ് അഴൂര് പെരുങ്ങുഴി ഇലങ്കമഠത്തില് ജയകുമാരന് നമ്പൂതിരി (49) ആണ് മരിച്ചത്. പൊള്ളലേറ്റ് ഗുരുതരാവസ്ഥയിലായിരുന്നു. തിരുവനന്തപുരത്ത് സ്വകാര്യ ആശുപത്രിയില് ചികിത്സയിലിരിക്കെയാണ് മരിച്ചത്.
ഈ മാസം മൂന്നാം തീയതിയാണ് അപകടം സംഭവിച്ചത്. നിവേദ്യം പാകം ചെയ്യുന്നതിനിടെയാണ് പൊട്ടിത്തെറി ഉണ്ടായത്. നിവേദ്യം പാകം ചെയ്യാന് വെച്ച ശേഷം മേല്ശാന്തി തിടപ്പള്ളിയില് നിന്ന് പുറത്തേക്കിറങ്ങിയിരുന്നു. കുറച്ച് കഴിഞ്ഞ് തിരിച്ച് കയറുന്നതിനിടെയാണ് പാചകവാതകം ചോര്ന്ന് പൊട്ടിത്തെറിയുണ്ടായത്. തിരികെ കയറുമ്പോള് മേല്ശാന്തിയുടെ കൈയില് വിളക്കുണ്ടായിരുന്നു. ഇതുമായി തിടപ്പള്ളിയിലേക്ക് കയറുന്നതിനിടെയാണ് തീപടര്ന്ന് പൊട്ടിത്തെറിച്ചത്.
