നിലമ്പൂര്: ഉപതെരഞ്ഞെടുപ്പിന് ഒരാഴ്ച മാത്രം ശേഷിക്കേ ഇരുമുന്നണികളും പ്രചാരണപ്പോര് കടുക്കുന്നു. വയനാട് എംപി പ്രിയങ്കാ ഗാന്ധിയും മുഖ്യമന്ത്രി പിണറായി വിജയനും നാളെ മുതല് മണ്ഡലത്തില് പ്രചാരണത്തിന് എത്തും. നിലമ്പൂര് മണ്ഡലത്തിലെ രണ്ടിടങ്ങളില് പ്രിയങ്ക ഗാന്ധി പ്രചാരണം നയിക്കും. മൂന്ന് ദിവസം മണ്ഡലത്തില് പ്രചാരണത്തിന് നേതൃത്വം നല്കുന്ന മുഖ്യമന്ത്രി ഏഴ് പഞ്ചായത്തുകളില് പര്യടനം നടത്തും.
ജൂണ് 19ന് നടക്കുന്ന നിലമ്പൂര് ഉപതെരഞ്ഞെടുപ്പില് 2,32,381 പേര്ക്കാണ് വോട്ടവകാശം. 1,13,613 പുരുഷ വോട്ടര്മാരും 1,18,760 സ്ത്രീ വോട്ടര്മാരും എട്ട് ട്രാന്സ്ജെന്ഡേഴ്സും ഉള്പ്പെടുന്നതാണ് പുതുക്കിയ വോട്ടര്പട്ടിക. ഇതില് 7787 പേര് പുതിയ വോട്ടര്മാരാണ്. 373 പ്രവാസി വോട്ടര്മാരും 324 സര്വിസ് വോട്ടര്മാരും ഉള്പ്പെട്ടിട്ടുണ്ട്.
59 പുതിയ പോളിങ് സ്റ്റേഷനുകള് ഉള്പ്പെടെ ആകെ 263 പോളിങ് സ്റ്റേഷനുകളാണുള്ളത്. ആദിവാസി മേഖലകള് മാത്രം ഉള്പ്പെടുന്ന വനത്തിനുള്ളില് മൂന്ന് ബൂത്തുകളാണ് സജ്ജീകരിക്കുക. റിസര്വ് ഉള്പ്പെടെ 315 വോട്ടിങ് യന്ത്രങ്ങളും 341 വിവിപാറ്റുകളും വോട്ടെടുപ്പിനായി ഉപയോഗിക്കും.
