മുക്കം കൂളിമാട് പാലത്തിന്റെ ബീമുകള് തകര്ന്ന സംഭവത്തില് പൊതുമരാമത്ത് വകുപ്പ് മന്ത്രി പി.എ.മുഹമ്മദ് റിയാസ് റിപ്പോര്ട്ട് തേടി. പൊതുമരാമത്ത് വകുപ്പ് വിജിലന്സ് വിഭാഗത്തോട് പരിശോധന നടത്താനും മന്ത്രി നിര്ദ്ദേശിച്ചു. കെആര്എഫ്ബി പ്രൊജക്ട് ഡയറക്ടറോടും ഉടന് റിപ്പോര്ട്ട് നല്കണമെന്ന് മന്ത്രി ആവശ്യപ്പെട്ടിട്ടുണ്ട്. കോഴിക്കോട്, മലപ്പുറം ജില്ലകളെ ബന്ധിപ്പിക്കുന്ന ഈ പാലത്തിന്റെ നിര്മാണം ഏറെക്കുറെ പൂര്ത്തിയാകുന്ന ഘട്ടത്തിലാണ് അപകടം ഉണ്ടായത്.
കഴിഞ്ഞ ദിവസം പ്രദേശത്ത് പെയ്ത ശക്തമായ മഴയെത്തുടര്ന്ന് താല്ക്കാലികമായി സ്ഥാപിച്ച തൂണുകള് താഴ്ന്ന് പോയതാണ് അപകടത്തിന് കാരണമായതെന്നായിരുന്നു പ്രാഥമിക വിലയിരുത്തല്. എന്നാല് ബീമിനെ താങ്ങി നിര്ത്തിയ ജാക്കിക്ക് പെട്ടന്നുണ്ടായ തകരാര് കാരണമാണ് അപകടമുണ്ടായതെന്നാണ് നിര്മാണ ചുമതലയുള്ള ഊരാളുങ്കല് കോപ്പറേറ്റീവ് സൊസൈറ്റി വിശദീകരിച്ചു. ഉടന് തന്നെ ഗര്ഡറുകള് പുനഃസ്ഥാപിച്ച് പാലം നിര്മാണം സമയബന്ധിതമായി പൂര്ത്തിയാക്കുമെന്നും ഊരാളുങ്കല് അറിയിച്ചു.
