കേരളത്തില് മഴ കനക്കുന്നു. വടക്കന് ജില്ലകളില് തന്നെയാണ് കൂടുതല് മഴ സാധ്യത. അറബിക്കടലിലെ ഇരട്ട ന്യൂനമര്ദ്ദമാണ് മഴ ശക്തമായി തുടരാന് കാരണം. ആറ് ജില്ലകളില് യെല്ലോ അലര്ട്ട് പ്രഖ്യാപിച്ചിരിക്കുകയാണ്.
എറണാകുളം, തൃശൂര്, കോഴിക്കോട്, വയനാട്, കണ്ണൂര്, കാസര്കോട് തുടങ്ങിയ ജില്ലകളിലാണ് യെല്ലോ അലര്ട്ട് പ്രഖ്യാപിച്ചിരിക്കുന്നത്. ശക്തമായ തിരമാലയ്ക്ക് സാദ്ധ്യതയുള്ളതിനാല് മത്സ്യതൊഴിലാളികള് കടലില് പോകുന്നതിന് വിലക്കേര്പ്പെടുത്തി. കടലാക്രമണ സാദ്ധ്യതയുള്ളതിനാല് തീരപ്രദേശങ്ങളിലുള്ളവര് ജാഗ്രത പാലിക്കണം.
വടക്ക് കിഴക്കന് അറബിക്കടലില് സൗരാഷ്ട്ര കച്ച് തീരത്തിന് സമീപമാണ് ശക്തികൂടിയ ന്യൂനമര്ദ്ദം നിലനില്ക്കുന്നത്. പടിഞ്ഞാറു ദിശയില് സഞ്ചരിക്കുന്ന ന്യുന മര്ദ്ദം ശക്തി പ്രാപിച്ചു തീവ്ര ന്യൂനമര്ദ്ദമാകുമെന്നാണ് കാലാവസ്ഥ വകുപ്പിന്റെ കണക്കുകൂട്ടല്. ഒഡിഷ തീരത്തിനും സമീപപ്രദേശത്തിനും മുകളിലായും ന്യൂനമര്ദ്ദം നിലനില്ക്കുന്നുണ്ട്. മണ്സൂണ് പാത്തി അതിന്റെ സാധാരണ സ്ഥാനത്തു നിന്ന് തെക്കോട്ടു മാറി സജീവമാണ്. ജൂലൈ 17 മുതല് മണ്സൂണ് പാത്തി വടക്കോട്ടു സഞ്ചരിക്കാന് സാധ്യതയുള്ളതിനാല് ഉത്തരേന്ത്യയില് പരക്കെ മഴ ലഭിക്കുമെന്നാണ് പ്രവചനം.
