ഉത്തര്പ്രദേശില് പ്രായപൂര്ത്തിയാവാത്ത പെണ്കുട്ടിയെ ബലാത്സംഗം ചെയ്തു ദൃശ്യങ്ങള് പ്രചരിപ്പിച്ച കേസില് ദമ്പതികള് അറസ്റ്റില്. ഉത്തര്പ്രദേശിലെ ബദാവുന് ജില്ലയിലെ ഫൈസ്ഗഞ്ച് ബേട്ടാ പൊലീസ് സ്റ്റേഷന് പരിധിയിലാണ് സംഭവം. പെണ്കുട്ടിയുടെ പരാതിയില് പ്രതികളെ അറസ്റ്റ് ചെയ്തതായി ഫൈസ്ഗഞ്ച് ബേട്ടാ പൊലീസ് സ്റ്റേഷന് ചുമതലയുള്ള പൊലീസ് ഉദ്യോഗസ്ഥന് ചരണ് സിങ് റാണ മാധ്യമങ്ങളോട് പറഞ്ഞു.
പോക്സോ, ഐടി വകുപ്പുകള് ചേര്ത്താണ് കേസ് രജിസ്റ്റര് ചെയ്തിരിക്കുന്നത്. പ്രതികളെ കോടതിയില് ഹാജരാക്കി റിമാന്ഡ് ചെയ്തു. വീട്ടിലേക്ക് ക്ഷണിച്ചുവരുത്തിയാണ് പീഡിപ്പിച്ചതെന്നാണ് പരാതിയില് പറയുന്നത്. പീഡനം നടക്കുമ്പോള് യുവതി മൊബൈല്ഫോണ് ഉപയോഗിച്ച് ദൃശ്യങ്ങള് മുഴുവന് പകര്ത്തി. പീഡന വിവരം പുറത്തുപറഞ്ഞാല് ദൃശ്യങ്ങള് സോഷ്യല് മീഡിയയില് അപ്ലോഡ് ചെയ്യുമെന്ന് ഭീഷണിപ്പെടുത്തുകയും ചെയ്തു. ഭയന്ന പെണ്കുട്ടി പീഡന വിവരം പുറത്താരോടും പറഞ്ഞില്ല.
എന്നാല് ദൃശ്യങ്ങള് ദമ്പതിമാര് സോഷ്യല് മീഡിയയില് പ്രചരിപ്പിച്ചു. ഇതുകണ്ടാണ് പെണ്കുട്ടിയുടെ വീട്ടുകാര് സംഭവം അറിയുന്നത്. തുടര്ന്നാണ് പരാതി നല്കിയത്. സംഭവത്തെക്കുറിച്ച് കൂരുതല് അന്വേഷണം ആരംഭിച്ചെന്നും വേറെ ഏതെങ്കിലും പെണ്കുട്ടിയെ ഇത്തരത്തില് പീഡിപ്പിച്ചിട്ടുണ്ടോ എന്ന് പരിശോധിക്കുമെന്നാണ് പൊലീസ് പറയുന്നത്. സംഭവത്തില് മറ്റാര്ക്കെങ്കിലും ബന്ധമുണ്ടോ എന്നും വ്യക്തമല്ല.
