കണ്ണൂര് പെരിങ്ങത്തൂര് ടൗണില് മഴുവുമായെത്തി യുവാവ് സൂപ്പര്മാര്ക്കറ്റിലെ സാധനങ്ങളും കൗണ്ടറുകളിലെ ചില്ലുകളും അടിച്ചു തകര്ത്തു. ഗുരുജിമുക്ക് സ്വദേശി ജമാലാണ് കഴിഞ്ഞ ദിവസം രാത്രി അക്രമം ഉണ്ടാക്കിയത് .ഇയാളെ പൊലീസ് അറസ്റ്റ് ചെയ്തിട്ടുണ്ട്. ഞായറാഴ്ച രാത്രി 8.45 ഓടെയാണ് സംഭവം. മഴുവുമായെത്തിയ ജമാല് ടൗണിലെ സഫാരി സൂപ്പര്മാര്ക്കറ്റിലേക്ക് കയറി. സൂപ്പര്മാര്ക്കറ്റിന്റെ പുറത്തുള്ള ചില്ലുകള് അടിച്ചു തകര്ക്കാന് തുടങ്ങി. ഷെല്ഫിലുണ്ടായിരുന്ന സാധനങ്ങളെല്ലാം അടിച്ചു തകര്ത്തു. ഫ്രിഡ്ജിന്റെ ചില്ലുകളും തകര്ത്ത ശേഷം ഇതിലുണ്ടായിരുന്ന രണ്ട് ചോക്ലേറ്റുകളെടുത്ത് പുറത്തിറങ്ങി. ഇയാളുടെ പരാക്രമം കണ്ട് നാട്ടുകാര് കടയ്ക്ക് മുന്നിലെത്തിയെങ്കിലും ഇവരെ ആയുധം വീശി ഭീഷണിപ്പെടുത്തി. പിടിച്ചു മാറ്റാന് ശ്രമിച്ച ചിലര്ക്ക് മഴു വീശുന്നതിനിടെ നിസാര പോറലേറ്റു. സൂപ്പര്മാര്ക്കറ്റിലെ അക്രമം കഴിഞ്ഞ് നിമിഷങ്ങള്ക്കകം ജമാലിന്റെ ഓട്ടോറിക്ഷ കത്തിനശിച്ച നിലയില് കണ്ടെത്തുകയും ചെയ്തു. പെരിങ്ങത്തൂര് ടൗണില് നിര്ത്തിയിട്ടിരുന്ന ഓട്ടോറിക്ഷയാണ് കത്തിനശിച്ചത്. ഇതിനുപിന്നാലെ യുവാവിനെ പോലീസ് പിടികൂടുകയായിരുന്നു.
സംഭവ സമയത്ത് യുവാവ് ലഹരി ഉപയോഗിച്ചിരുന്നെന്നും ഇയാള് ലഹരിക്കടിമയാണെന്ന് സംശയമുണ്ടെന്നും പൊലീസ് പറയുന്നു.
