പാലക്കാട്: ലീഗ് അണികളും മതന്യൂനപക്ഷങ്ങളും ഇന്നലെ വരെ സന്ദീപ് വാര്യര് സ്വീകരിച്ച നിലപാട് അറിയുന്നവരാണെന്ന് മുഖ്യമന്ത്രി പിണറായി വിജയന്. ബി.ജെ.പി വിട്ടെത്തിയ സന്ദീപ് വാര്യരുടെ കോണ്ഗ്രസ് പ്രവേശനം മാധ്യമങ്ങള് മഹത്വവത്കരിക്കുകയാണെന്നും മുഖ്യമന്ത്രി പറഞ്ഞു.
മേപ്പറമ്പില് തെരഞ്ഞെടുപ്പ് പ്രചാരണത്തിന്റെ ഭാഗമായുള്ള പൊതുയോഗത്തില് സംസാരിക്കുകയായിരുന്നു മുഖ്യമന്ത്രി. സന്ദീപ് വാര്യര് പാണക്കാട് പോയി എന്ന വാര്ത്ത കണ്ടു. ലീഗ് അണികള് ഇന്നലെ വരെ സന്ദീപ് സ്വീകരിച്ച നിലപാട് അറിയുന്നവരാണ്. ബാബറി മസ്ജിദ് തകര്ത്ത ശേഷമുള്ള ഒറ്റപ്പാലം തെരഞ്ഞെടുപ്പ് ആണ് ഓര്മവന്നത്. ലീഗ് ബാബറി മസ്ജിദ് തകര്ത്ത കോണ്ഗ്രസിനൊപ്പം നിന്നുവെന്നും മുഖ്യമന്ത്രി കുറ്റപ്പെടുത്തി. ബാബറി മസ്ജിദ് തകര്ത്തത് ആര്.എസ്.എസ് നേതൃത്വത്തില് ഉള്ള സംഘപരിവാര് ആണ്. എല്ലാ ഒത്താശയും ചെയ്തത് കോണ്ഗ്രസ് നേതൃത്വത്തില് ഉള്ള കേന്ദ്ര സര്ക്കാറാണെന്നും മുഖ്യമന്ത്രി പറഞ്ഞു.
