കളമശ്ശേരിയില് കെട്ടിട നിര്മാണത്തിനിടെ മണ്ണിടിഞ്ഞ് നാലു അതിഥി തൊഴിലാളികള് മരിച്ചു.പശ്ചിമ ബംഗാള് സ്വദേശികളാണ് മരിച്ചത്.ഫൈജുൽ മണ്ഡൽ, കൂടൂസ് മണ്ഡൽ, നൗജേഷ് മണ്ഡൽ, നൂറാമിൻ മണ്ഡൽ എന്നീ അതിഥി തൊഴിലാളികളാണ് മരിച്ചത്. മണ്ണിനടിയില് കുടുങ്ങിയ ഒരാള്ക്കായി തിരച്ചില് പുരോഗമിക്കുകയാണ്. ഏഴു തൊഴിലാളികളാണ് അപകടത്തില്പെട്ടത്. സംഭവം നടന്നയുടനെ പുറത്തെത്തിച്ച രണ്ടു പേര് നിസാര പരിക്കുകളോടെ രക്ഷപ്പെട്ടു. അവർ കളമശ്ശേരി മെഡിക്കൽ കോളേജ് ആശുപത്രിയിൽ ചികിത്സയിലാണ്.
കളമശ്ശേരി മെഡിക്കല് കോളേജിന്അടുത്തുള്ള ഇലക്ട്രോണിക് സിറ്റിയില് നിര്മാണം നടക്കുന്നതിനിടെയാണ് അപകടം. വെള്ളിയാഴ്ച്ച ഉച്ചയ്ക്ക് രണ്ടു മണിയോടെയായിരുന്നു സംഭവം. നെസ്റ്റ് ഗ്രൂപ്പിന്റെ ഇലക്ട്രാണിക് സിറ്റിയിൽ നിർമ്മാണ പ്രവർത്തനങ്ങൾക്കായി കുഴിയെടുക്കുന്നതിനിടെ മണ്ണ് ഇടിഞ്ഞ് കുഴിയിലുണ്ടായിരുന്ന തൊഴിലാളികളുടെ ദേഹത്തേക്ക് വീണാണ് അപകടമുണ്ടായത്.
