അനുനയനീക്കം സജീവം
തിരുവനന്തപുരം: കെപിസിസി പുനഃസംഘടനയിൽ പ്രതിഷേധമുള്ള സാഹചര്യത്തിൽ, കെപിസിസി നടത്തുന്ന ശബരിമല വിശ്വാസ സംരക്ഷണ ജാഥയുടെ സമാപന പരിപാടിയിൽ പങ്കെടുക്കില്ലെന്ന നിലപാടെടുത്ത് ക്യാപ്റ്റൻമാരിൽ ഒരാളായ കെ മുരളീധരൻ.
കാസർകോട് നിന്ന് ആരംഭിച്ച നാല് ജാഥകളിൽ ഒന്നിന്റെ ക്യാപ്റ്റനായിരുന്ന കെ. മുരളീധരൻ, ഇന്നലെ ജാഥ ചെങ്ങന്നൂരിൽ എത്തിയതിന് പിന്നാലെ ഗുരുവായൂരിലേക്ക് മടങ്ങി. തുടർന്ന് അദ്ദേഹം തിരുവനന്തപുരത്തേക്ക് മടങ്ങാനാണ് തീരുമാനിച്ചിരിക്കുന്നത്.
നാല് ക്യാപ്റ്റൻമാരിൽ ഒരാൾ സമാപനത്തിൽ നിന്ന് വിട്ടുനിൽക്കുന്നത് കോൺഗ്രസിന് വലിയ ക്ഷീണമുണ്ടാക്കുമെന്ന സാഹചര്യത്തിൽ, മുരളീധരനെ അനുനയിപ്പിക്കാനുള്ള നീക്കങ്ങൾ കോൺഗ്രസ് നേതൃത്വം സജീവമായി തുടരുകയാണ്.
ഇതോടെ പുനഃസംഘടനയുമായി ബന്ധപ്പെട്ട് കോൺഗ്രസിലെ കൂടുതൽ മുതിർന്ന നേതാക്കളുടെ അതൃപ്തി മറനീക്കി പുറത്തു വരികയാണ്. കെപിസിസി പുനഃസംഘടനയെ പരിഹസിച്ചുകൊണ്ട് കെ സുധാകരനും രംഗത്തെത്തി. “പുനഃസംഘടനയിൽ താൻ തൃപ്തനാണ്, ഇത്രയും തൃപ്തി മുൻപ് ഉണ്ടായിട്ടില്ല” എന്നായിരുന്നു സുധാകരന്റെ പരിഹാസ രൂപേണയുള്ള പ്രതികരണം. പുനഃസംഘടനയുമായി ബന്ധപ്പെട്ട് കോൺഗ്രസിനുള്ളിൽ തർക്കങ്ങളും ചേരിതിരിവുകളും രൂക്ഷമാകുന്നതിനിടെയാണ് മുരളീധരന്റെ ഈ കടുത്ത നിലപാട്.
