കെഎസ്ആര്ടിസി ബസില് പീഡനശ്രമമെന്ന് വിദ്യാര്ത്ഥിനിയുടെ പരാതിയിൽ ഡ്രൈവർക്ക് സസ്പെൻഷൻ. പത്തനംതിട്ടയിൽ നിന്ന് ബെംഗളൂരുവിലേക്ക് പോയ ബസിലെ ഡ്രൈവർ ഷാജഹാനെയാണ് പ്രാഥമിക അന്വേഷണത്തിൻ്റെ അടിസ്ഥാനത്തിൽ സസ്പെൻഡ് ചെയ്തത്. വെള്ളിയാഴ്ച വൈകിട്ട് പത്തനംതിട്ടയില്നിന്ന് ബെംഗളൂരുവിലേക്ക് പോയ ബസില് കോട്ടയത്തുനിന്നാണ് പരാതിക്കാരി കയറിയത്. പുലര്ച്ചെ മൂന്ന് മണിയോടെ ബസ് കൃഷ്ണഗിരിയില് എത്തിയപ്പോള് ജനല്ച്ചില്ല് നീക്കാനായി വിദ്യാര്ഥിനി ഡ്രൈവറുടെ സഹായം തേടി. ഈ സമയത്ത് ഡ്രൈവര് അപമര്യാദയായി പെരുമാറിയെന്നാണ് വിദ്യാര്ഥിനിയുടെ ആരോപണം. ഡ്രൈവറുടെ ഭാഗത്തുനിന്നുണ്ടായ പെരുമാറ്റം തനിക്ക് ഷോക്കുണ്ടാക്കിയെന്നും ഇതിനാല് ആ സമയത്ത് പ്രതികരിക്കാനായില്ലെന്നും പരാതിക്കാരി പറയുന്നുണ്ട്. പിന്നീട് കെ.എസ്.ആര്.ടി.സി. അധികൃതര്ക്ക് ഇ-മെയില് വഴി പരാതി നല്കുകയായിരുന്നു.
