തിരുവനന്തപുരം: സംസ്ഥാനത്ത് അഞ്ചുദിവസത്തിനുള്ളില് കാലവര്ഷമെത്തുമെന്ന് കേന്ദ്ര കാലാവസ്ഥാ വകുപ്പ്. ഇന്ന് നാലു ജില്ലകളില് അതിതീവ്ര മഴക്കുള്ള മുന്നറിയിപ്പും നല്കിയിട്ടുണ്ട്. കോഴിക്കോട്, വയനാട്, കണ്ണൂര്, കാസര്കോഡ് ജില്ലകളിലാണ് റെഡ് അലര്ട്ടുള്ളത്.
ശക്തമായ കാറ്റിനും ഇടിക്കും സാധ്യതയുള്ളതിനാല് വടക്കന് കേരളത്തില് ജാഗ്രത വേണമെന്നും കാലാവസ്ഥാ വകുപ്പ് മുന്നറിയിപ്പ് നല്കി. ഇന്നലെ സംസ്ഥാനത്ത് പലയിടത്തും ശക്തമായ മഴയാണ് ലഭിച്ചത്. വടക്കന് ജില്ലകളില് മിക്കയിടത്തും മഴ കനത്തു. കോഴിക്കോട്, കോട്ടയം ജില്ലകളില് മലയോരമേഖലയില് മഴ തുടരുകയാണ്.
തെക്കന് അറബിക്കടല്, മാലദ്വീപ്, കന്യാകുമാരി മേഖല, ആന്ഡമാന് കടല്, ആന്ഡമാന് ദ്വീപ്, തെക്കന് ബംഗാള് ഉള്ക്കടല്, മധ്യ ബംഗാള് ഉള്ക്കടല് എന്നിവയുടെ കൂടുതല് ഭാഗങ്ങളിലേക്ക് കാലവര്ഷം വ്യാപിച്ചതായും കാലാവസ്ഥ വകുപ്പ് അറിയിച്ചു. അതിന്റെ സ്വാധീനഫലമായി മഴ കനക്കാനാണ് സാധ്യത.
മധ്യ പടിഞ്ഞാറന് ബംഗാള് ഉള്ക്കടലിനും തെക്കു പടിഞ്ഞാറന് ഉള്ക്കടലിനും മുകളിലായി ചക്രവാതച്ചുഴി സ്ഥിതിചെയ്യുന്നുണ്ട്. മധ്യ കിഴക്കന് അറബിക്കടലില് കര്ണാടക തീരത്തിന് മുകളിലായി മേയ് 21ഓടെ ഉയര്ന്ന ലെവലില് ചക്രവാതച്ചുഴി രൂപപ്പെട്ട് 22ഓടെ ന്യൂനമര്ദ്ദമായി ശക്തിപ്രാപിക്കാന് സാധ്യതയുണ്ട്. തുടര്ന്ന് വടക്കു ദിശയില് സഞ്ചരിച്ചു വീണ്ടും ശക്തി പ്രാപിക്കാന് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു.
