മലപ്പുറം : മലപ്പുറത്ത് കൺസ്യൂമർഫെഡ് മദ്യവില്പനശാലയിൽ വിജിലൻസിന്റെ മിന്നൽ പരിശോധന. രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. മദ്യ വില്പനശാലയിലെ ചില ഉദ്യോഗസ്ഥർ മദ്യ കമ്പനികളുടെ ഏജന്റുമാരിൽ നിന്നും കൈക്കൂലി വാങ്ങുന്നുവെന്നാണ് ലഭിച്ച വിവരം. ഇതേതുടർന്ന് ഇന്നലെ ഉച്ചയോടെ മലപ്പുറം മുണ്ടുപറമ്പിലെ വിദേശ മദ്യവില്പനശാലയിൽ വിജിലൻസ് എത്തുകയായിരുന്നു.
സംഘത്തിന്റെ മിന്നൽ പരിശോധനയിൽ കണക്കിൽപ്പെടാത്ത 43,430 രൂപ പിടിച്ചെടുത്തു. മുണ്ടുപറമ്പ് വിദേശ മദ്യ വില്പനശാലയിലെ ചില ഉദ്യോഗസ്ഥർ മദ്യ കമ്പനികളുടെ ഏജന്റുമാരിൽ നിന്നും കൈക്കൂലി വാങ്ങിയ പണമാണ് കണ്ടെടുത്തത്. സംഭവത്തിൽ സിസിടിവി ദൃശ്യങ്ങളടക്കം വിജിലൻസ് സംഘം പരിശോധിക്കുന്നുണ്ട്. ഉദ്യോഗസ്ഥരിൽ നിന്നാണ് പണം പിടിച്ചെടുത്തതെന്നും അന്വേഷണം തുടരുമെന്നും വിജിലൻസ് സംഘം അറിയിച്ചു.
