ലോക കേരള സഭ സമ്മേളനത്തോടനുബന്ധിച്ച് വിവാദ ഇടനിലക്കാരി അനിത പുല്ലയില് നിയമസഭ മന്ദരിത്തില് പ്രവേശിച്ച സംഭവത്തില് 4 കരാര് ജീവനക്കാരെ പുറത്താക്കും. സംഭവത്തില് വീഴ്ചയുണ്ടായെന്ന് സ്പീക്കര് എംബി രാജേഷ് പറഞ്ഞു.അനിത പുല്ലയിലിന് ഓപ്പൺ ഫോറത്തിലേക്കുള്ള പാസ് ഉണ്ടായിരുന്നു. അത് വച്ച് എങ്ങനെ നിയമസഭ മന്ദിരത്തിന് അകത്ത് കയറി എന്നതാണ് അന്വേഷിച്ചത്. സഭ ടിവിയുടെ സാങ്കേതിക സഹായം നൽകുന്ന ഏജൻസിയുടെ ജീവനക്കാരിക്കൊപ്പമാണ് അകത്ത് കയറിയത്.സഭാ ടിവിക്ക് ഒടിടി സഹായം നൽകുന്ന ബിട്രൈയിറ്റ് സൊലൂഷനിലെ ജീവനക്കാരുടെ സഹായത്തോടെയാണെന്ന് ചീഫ് മാർഷലിൻറെ റിപ്പോർട്ട് പുറത്തുവന്നിരുന്നു. സഭാ ടിവി ഓപ്പൺ ഫോറത്തിൽ പങ്കെടുക്കാനുള്ള ക്ഷണക്കത്ത് അനിതയുടെ കൈവശം ഉള്ളത് കൊണ്ടാണ് കടത്തിവിട്ടതെന്നാണ് സുരക്ഷാ ചുമതലയുള്ള ഉദ്യോഗസ്ഥർ മൊഴി നൽകിയത് .പ്രവീണ്, ഫസീല, വിദുരാജ്, വിഷ്ണു എന്നിവരെയാണ് പുറത്താക്കിയത്. അന്വേഷണത്തില് കുറ്റക്കാരാണെന്ന് കണ്ടെത്തിയ സാഹചര്യത്തിലാണ് നടപടിയെടുത്തതെന്നും സ്പീക്കര് പറഞ്ഞു. ലോകകേരള സഭ നടന്ന ശങ്കരനാരായണന് തമ്പി ഹാളിലോ, അതിനടുത്തോ അനിത പുല്ലയില് എത്തിയിട്ടില്ല. ലഭ്യമായ സിസി ടിവികളെല്ലാം പരിശോധിച്ചതായും സ്പീക്കര് പറഞ്ഞു. ഓപ്പണ് ഫോറത്തില് പങ്കെടുക്കുന്ന പാസുമായാണ് അനിത പുല്ലയില് അകത്തുകയറിയത്. പൊതുജനങ്ങള്ക്ക് നല്കിയ പാസാണിത്. ഇത്തരത്തില് 500 പേര്ക്ക് പാസ് നല്കിയതായും ഇത് ആര്ക്കും വ്യക്തിപരമായി നല്കിതായിരുന്നില്ലെന്നും എംബി രാജേഷ് പറഞ്ഞു.ലോക കേരള സഭക്കിടെ അനിതാ പുല്ലയിൽ നിയമസഭാ മന്ദിരത്തിലെത്തിയത് വൻ വിവാദമായതോടെയാണ് അന്വേഷണത്തിന് സ്പീക്കർ നിയമസഭാ ചീഫ് മാർഷലിനെ ചുമതലപ്പെടുത്തിയത്.
