ജൂലൈ മാസത്തിലെ ക്ഷേമ പെന്ഷന് വിതരണം വെള്ളിയാഴ്ച ആരംഭിക്കുമെന്ന് ധനകാര്യ മന്ത്രി കെ എന് ബാലഗോപാല് അറിയിച്ചു. ഇതിനായി 831 കോടി രൂപ അനുവദിച്ചു. 62 ലക്ഷത്തോളം പേര്ക്കാണ് 1600 രൂപവീതം ലഭിക്കുന്നത്. 26 ലക്ഷത്തിലേറെ പേര്ക്ക് ബാങ്ക് അക്കൗണ്ടില് തുക എത്തും. മറ്റുള്ളവര്ക്ക് സഹകരണ ബാങ്കുകള് വഴി വീട്ടിലെത്തി പെന്ഷന് കൈമാറും. 8.46 ലക്ഷം പേര്ക്ക് ദേശീയ പെന്ഷന് പദ്ധതിയിലെ കേന്ദ്ര വിഹിതം കേന്ദ്ര സര്ക്കാരാണ് നല്കേണ്ടത്. ഇതിനാവശ്യമായ 24.31 കോടി രൂപയും സംസ്ഥാനം മുന്കൂര് അടിസ്ഥാനത്തില് അനുവദിച്ചിട്ടുണ്ട്. ഈ വിഹിതം കേന്ദ്ര സര്ക്കാരിന്റെ പിഎഫ്എംഎസ് സംവിധാനം വഴിയാണ് ഗുണഭോക്താക്കളുടെ ബാങ്ക് അക്കൗണ്ടിലേക്ക് ക്രഡിറ്റ് ചെയ്യേണ്ടത്.
രണ്ടാം പിണറായി സര്ക്കാരിന്റെ നാലു വര്ഷ കാലയളവില് 38,500 കോടി രൂപയോളമാണ് സാമൂഹ്യസുരക്ഷാ പെന്ഷന് നല്കാനായി ആകെ ചെലവഴിച്ചത്. 2016-21 ലെ എല്ഡിഎഫ് സര്ക്കാരിന്റെ കാലത്താകട്ടെ, യുഡിഎഫ് ഭരണകാലത്തെ 18 മാസത്തെ കുടിശ്ശികയുള്പ്പെടെ 35,154 കോടി രൂപ ക്ഷേമപെന്ഷനായി വിതരണം ചെയ്തു. ഒമ്പത് വര്ഷം കൊണ്ട് ഒന്നും രണ്ടും പിണറായി സര്ക്കാരുകള് ക്ഷേമപെന്ഷനായി നല്കിയത് 73,654 കോടി രൂപയാണ്. 2011-16 ലെ യുഡിഎഫ് സര്ക്കാരിന്റെ കാലത്ത് ക്ഷേമ പെന്ഷനായി ആകെ നല്കിയ തുക 9,011 കോടി രൂപയും.
