കോഴിക്കോട്: കൊടുവള്ളി ടൗണില് നിര്ത്തിയിട്ടിരുന്ന സ്കൂട്ടര് മോഷ്ടിച്ച യുവാവിനെ പോലീസ് പിടികൂടി. നരിക്കുനി പാറന്നൂര് പുല്പ്പറമ്പില് പുറായില് റാസി യൂനസ് (24) നെയാണ് കൊടുവള്ളി പോലീസ് അറസ്റ്റുചെയ്തത്. കൊടുവള്ളി കാനറാ ബാങ്കിനു സമീപം നിര്ത്തിയിട്ടിരുന്ന സ്കൂട്ടറാണ് ഇയാള് പട്ടാപ്പകല് മോഷ്ടിച്ചത്.
ഈ മാസം പതിനൊന്നിനായിരുന്നു സംഭവം. രാവിലെ സ്കൂട്ടര് നിര്ത്തിയിട്ട് ജോലിക്കുപോയ ഉടമ വൈകുന്നേരം മടങ്ങിയെത്തിയപ്പോള് സ്കൂട്ടര് കാണാഞ്ഞതിനെ തുടര്ന്നാണ് കൊടുവള്ളി പോലീസില് പരാതി നല്കിയത്. പോലീസ് നടത്തിയ അന്വേഷണത്തില് പ്രതി സ്കൂട്ടര് കടത്തിക്കൊണ്ടുപോകുന്നതിന്റെ സിസിടിവി ദൃശ്യങ്ങള് ലഭിച്ചു.
ഇതു കേന്ദ്രീകരിച്ചായിരുന്നു കൊടുവള്ളി ഇന്സ്പെക്ടര് പി. ചന്ദ്രമോഹന്റെ നേതൃത്വത്തിലുള്ള തുടരന്വേഷണം. ഇതിലാണ് മോഷ്ടിച്ച സ്കൂട്ടര് വില്ക്കാനുള്ള നീക്കത്തിനിടെ റാസി യൂനസ് പിടിയിലായത്. രൂപമാറ്റം വരുത്തി വ്യാജനമ്പര് പ്ലേറ്റ് ഘടിപ്പിച്ച നിലയിലായിരുന്നു സ്കൂട്ടര്. ഇതുമായി യാത്ര ചെയ്യുന്നതിനിടെയാണ് പ്രതിയെ പിടികൂടിയത്.
എസ്ഐ അനൂപ് അരീക്കര, സീനിയര് സിവില് പോലീസ് ഓഫീസര്മാരായ എന്.എം. ജയരാജന്, അജീഷ്, സിവില് പോലീസ് ഓഫീസര് ഷഫീഖ് നീലിയാനിക്കല് എന്നിവരുള്പ്പെട്ട സംഘമാണ് പ്രതിയെ പിടികൂടിയത്. താമരശേരി കോടതിയില് ഹാജരാക്കിയ റാസി യൂനുസിനെ റിമാന്ഡ് ചെയ്തു. തുടരന്വേഷണത്തിനായി പ്രതിയെ കസ്റ്റഡിയില് വാങ്ങുമെന്ന് പോലീസ് അറിയിച്ചു.
