കോണ്ഗ്രസിനെതിരെ പരസ്യ വിമര്ശനവുമായി ആര്എസ്പി നേതാക്കളും. യുഡിഎഫ് മുന്നണി വിട്ടേക്കുമെന്ന സൂചന നല്കിയ ഷിബു ബേബി ജോണ്, കോണ്ഗ്രസ് നേതാക്കള് സ്വയം കപ്പല് മുക്കുകയാണെന്നും കുറ്റപ്പെടുത്തി. ‘കോണ്ഗ്രസ് എന്ന കപ്പല് മുങ്ങുകയല്ല. പകരം നേതാക്കള് തന്നെ മുക്കുകയാണ്. അങ്ങനെ മുക്കുന്ന കപ്പലില് നിന്ന് പോകാനല്ലേ എല്ലാവരും ആഗ്രഹിക്കുക’ എന്നായിരുന്നു മുന്നണി വിടുമോ എന്നതിനോട് ഷിബു ബേബി ജോണിന്റെ പ്രതികരണം.
‘രാജ്യത്ത് കോണ്ഗ്രസിന്റെ ആവശ്യം മനസിലാക്കി ഒപ്പം നില്ക്കുന്നവരാണ് ഞങ്ങള്. പക്ഷേ കോണ്ഗ്രസിന്റെ നേതാക്കള് അത് മനസിലാക്കുന്നില്ലെന്നും’ ഷിബു ബേബി ജോണ് മാധ്യമങ്ങളോട് പ്രതികരിച്ചു.
യുഡിഎഫ് യോഗത്തില് നിന്ന് വിട്ട് നില്ക്കുമെന്ന് കഴിഞ്ഞ ദിവസം ആര്എസ്പി വ്യക്തമാക്കിയിരുന്നു. ഉഭയകക്ഷി ചര്ച്ച ആവശ്യപ്പെട്ട് കത്ത് നല്കി 40 ദിവസമായിട്ടും പരിഗണിക്കാത്തതില് പ്രതിഷേധിച്ചാണ് നടപടി. ആര്എസ്പിയുടെ പരസ്യപ്രതികരണത്തിന് പിന്നാലെ തിങ്കളാഴ്ച യുഡിഎഫ് യോഗത്തിന് മുന്പ് അവരുമായി ചര്ച്ച നടത്തുമെന്ന് കണ്വീനര് എംഎം ഹസ്സന് അറിയിച്ചിട്ടുണ്ട്.