കോഴിക്കോട്: 44 പേറ്റൻ്റ് അപേക്ഷകളും നിരവധി ഗവേഷണ പദ്ധതികളുമായി രാജ്യത്തെ ഏറ്റവും മികച്ച ഗവേഷണ സ്ഥാപനങ്ങളിലൊന്നായി മാറുകയാണ് കോഴിക്കോട് എൻ ഐ ടി. 2023ൽ 59 സ്പോൺസർഡ് പ്രോജക്ടുകളും ഇൻസ്റ്റിറ്റ്യൂട്ട് നേടിയിട്ടുണ്ട്. നാഷണൽ ഇൻസ്റ്റിറ്റ്യൂഷണൽ റാങ്കിംഗ് ഫ്രെയിംവർക്ക് 2023 പ്രകാരം ഇന്നൊവേഷൻ റാങ്കിംഗിൽ എൻ ഐ ടി സി 8-ാം സ്ഥാനം നേടിയിട്ടുണ്ട്. അടിസ്ഥാന ഗവേഷണത്തിനും നൂതന സാങ്കേതിക വികസനത്തിനും ഗണ്യമായ സംഭാവനകളിലൂടെ ഒരു മൾട്ടി ഡിസിപ്ലിനറി എജ്യുക്കേഷൻ ആൻഡ് റിസർച്ച് യൂണിവേഴ്സിറ്റി (MERU) ആയി മാറുക എന്നതാണ് ഇൻസ്റ്റിറ്റ്യൂട്ടിൻ്റെ ലക്ഷ്യമെന്ന് എൻ ഐ ടി കോഴിക്കോട് ഡയറക്ടർ പ്രൊഫ. പ്രസാദ് കൃഷ്ണ പറഞ്ഞു. ലോകമെമ്പാടുമുള്ള വിവിധ സ്ഥാപനങ്ങളുമായി സഹകരിച്ച് കാമ്പസിൽ മികച്ച ഗവേഷണ അന്തരീക്ഷം പ്രോത്സാഹിപ്പിക്കുന്നതിനല്ല അശ്രാന്ത പരിശ്രമത്തിലാണ് തങ്ങളെന്ന് അദ്ദേഹം കൂട്ടിച്ചേർത്തു. സ്ഥാപനം 2020 മുതൽ 40 ഓളം ധാരണാപത്രങ്ങളിൽ ഒപ്പുവെച്ചിട്ടുണ്ട്. സർക്കാർ സ്ഥാപനങ്ങൾ ഉൾപ്പെടെയുള്ള സ്ഥാപനങ്ങളുമായും വിവിധ സംഘടനകളുമായും സ്ഥാപനം ധാരണ പത്രത്തിൽ ഒപ്പുവച്ചിട്ടുണ്ട്. കോഴിക്കോട് മെഡിക്കൽ കോളേജ്, ഓക്സ്ഫോർഡ് ബ്രൂക്ക്സ് യൂണിവേഴ്സിറ്റി, സെന്റർ ഫോർ വാട്ടർ റിസോഴ്സ്സ് ഡെവലപ്മെന്റ് ആൻഡ് മാനേജ്മന്റ്, ബ്യൂറോ ഓഫ് ഇന്ത്യൻ സ്റ്റാൻഡേർഡ്സ്, ന്യൂഡൽഹി; ഡെൽ ടെക്നോളജീസ്; സി ആർ ആർ ഐ ന്യൂഡൽഹി, എൻ ഐ ഐ എസ് ടി തിരുവനന്തപുരം, വിവിധ ഐഐടികൾ, മറ്റ് സ്ഥാപനങ്ങൾ എന്നിവയുമായി ബഹുമുഖ സഹകരണ ഗവേഷണ പ്രോജക്ടുകൾ ആരംഭിക്കാൻ ധാരണാപത്രങ്ങൾ സഹായിക്കും. ഗവേഷണത്തിൻ്റെ മുൻനിരയിൽ തന്നെ സ്ഥാപനത്തെ എത്തിക്കുക എന്ന ലക്ഷ്യത്തോടെ ചലനാത്മകവും സഹകരണപരവുമായ ഒരു ആവാസവ്യവസ്ഥ വളർത്തിയെടുക്കുക എന്നതാണ് ഞങ്ങളുടെ ദൗത്യമെന്ന് റിസർച്ച് ആൻഡ് കൺസൾട്ടൻസി ഡീൻ പ്രൊഫ. എൻ സന്ധ്യാറാണി പറഞ്ഞു. ഡിപ്പാർട്ട്മെൻ്റ് തലത്തിലും സെൻട്രൽ റിസർച്ച് ഫെസിലിറ്റി തലത്തിലും അത്യാധുനിക അടിസ്ഥാന സൗകര്യങ്ങളോടെ ഗവേഷണ സൗഹൃദ അന്തരീക്ഷവും ഇൻസ്റ്റിറ്റ്യൂട്ട് സൃഷ്ടിക്കുന്നുണ്ടെന്നും അവർ കൂട്ടിച്ചേർത്തു. 2023-ൽ, ഡിപ്പാർട്ട്മെൻ്റുകളിലുടനീളമുള്ള അധ്യാപക അംഗങ്ങൾക്ക് ഏകദേശം 20 കോടി രൂപയുടെ 59 പുതിയ സ്പോൺസർഡ് പ്രോജക്ടുകൾ ലഭിച്ചു. കൂടാതെ നിതി ആയോഗ് തിരഞ്ഞെടുത്ത മൂന്ന് പ്രൊജെക്ടുകൾക്ക് 2023 ഒക്ടോബറിൽ ഫ്രാൻസിലെ പാരീസിൽ നടന്ന ബ്ലൂ ഇക്കോണമി ആൻഡ് ഓഷ്യൻ അഡ്മിനിസ്ട്രേഷൻ സംബന്ധിച്ച ഇന്ത്യ-ഫ്രാൻസ് ഉഭയകക്ഷി ചർച്ചകളുൾക്കുശേഷം ഉരുത്തിരിഞ്ഞ പദ്ധതികളുടെ ഭാഗമായി. കൂടാതെ ഇന്ത്യൻ പൈതൃക കെട്ടിടങ്ങൾ സംരക്ഷിക്കുന്നതിനായി പരിസ്ഥിതി സൗഹൃദ ഡിജിറ്റൽ നിർമ്മാണ സാങ്കേതിക വിദ്യകൾക്കായി ജൈവ-അധിഷ്ഠിത സാമഗ്രികൾ വികസിപ്പിക്കുന്നതിനുള്ള ശാസ്ത്ര സാങ്കേതിക വകുപ്പിന്റെ സയൻസ് ആൻഡ് ഹെറിറ്റേജ് റിസർച്ച് ഇനിഷ്യേറ്റീവ് (SHRI) പദ്ധതിയുടെ ഭാഗമായി 1 കോടി രൂപയുടെ ഒരു പദ്ധതിയും സ്ഥാപനത്തിന് ലഭിച്ചിട്ടുണ്ട്. നിലവിലുള്ള കണക്കുകൾ പ്രകാരം വിവിധ വകുപ്പുകളിലും കേന്ദ്രങ്ങളിലുമായി 200 പദ്ധതികൾ നടന്നുകൊണ്ടിരിക്കുന്നു. അവയിൽ മിക്കതും മൾട്ടി ഡിസിപ്ലിനറി, ഇൻ്റർ ഡിസിപ്ലിനറി ഗണത്തിൽ വരുന്നവയാണ്. ടെസ്റ്റിംഗ്, കൺസൾട്ടൻസി സേവനങ്ങൾക്ക് കീഴിൽ മാത്രം 1.31 കോടിയിലധികം രൂപയുടെ ആഭ്യന്തര വരുമാനം ഇൻസ്റ്റിറ്റ്യൂട്ട് ഉണ്ടാക്കിയിട്ടുണ്ട്. നിലവിൽ ഇന്ത്യയിൽ രണ്ടാം സ്ഥാനത്തുള്ള എൻഐടിസിയിലെ ആർക്കിടെക്ചർ ആൻ്റ് പ്ലാനിംഗ് ഡിപ്പാർട്ട്മെൻ്റ് കോഴിക്കോടിന് “യുനെസ്കോ സാഹിത്യ നഗരം” പദവി ലഭിക്കുന്നതിൽ നിർണായക പങ്കുവഹിച്ചു. കൂടാതെ ഹൗസിംഗ് ആൻഡ് അർബൻ അഫയേഴ്സ് മന്ത്രാലയം (അമൃത് ഡിവിഷൻ) നഗരാസൂത്രണത്തിലും രൂപകൽപ്പനയിലും മികവിൻ്റെ കേന്ദ്രമായും എൻ ഐ ടി സി യെ തിരഞ്ഞെടുത്തിട്ടുണ്ട്. ആർട്ടിഫിഷ്യൽ ഇൻ്റലിജൻസിന്റെ സെൻറർ ഓഫ് എക്സലൻസിലേക്കുള്ള യാത്രയിലാണ് എൻഐടിസി. ഇതിനായി കേന്ദ്ര വിദ്യാഭ്യാസ മന്ത്രാലയത്തിന്റെ 2 കോടിയുടെ പ്രാരംഭ ധനസഹായവും ലഭിച്ചു. കമ്പ്യൂട്ടർ സയൻസ്, ഇലക്ട്രോണിക്സ് ആൻഡ് കമ്മ്യൂണിക്കേഷൻ, സിവിൽ എഞ്ചിനീയറിംഗ്, ആർക്കിടെക്ചർ ആൻഡ് പ്ലാനിംഗ്, മാനേജ്മെൻ്റ് സ്റ്റഡീസ് എന്നീ വിഭാഗങ്ങളിൽ നിന്നുള്ള 14 അധ്യാപകരുടെ ഒരു ടീം പദ്ധതിയിൽ പ്രവർത്തിക്കുന്നു. 5Gയിലും അതിനപ്പുറമുള്ള സാങ്കേതിക വിദ്യകളിലും കഴിവുകൾ വളർത്തിയെടുക്കാൻ സാങ്കേതിക വകുപ്പിന്റെ ഒരു യൂസ് കെയ്സ് ലാബിനും എൻ ഐ ടി കാലിക്കറ്റിനെ തിരഞ്ഞെടുത്തു. പാലക്കാട് ഐഐടിയുമായി സഹകരിച്ച് പെരിയാർ നദീതടത്തിൻ്റെ അവസ്ഥ വിലയിരുത്തലും മാനേജ്മെൻ്റ് പ്ലാനും സംബന്ധിച്ച പഠനങ്ങൾ പൂർത്തിയാക്കാൻ ജലശക്തി മന്ത്രാലയം 6 കോടി രൂപയുടെ പദ്ധതി കോഴിക്കോട് എൻ ഐ ടി യിലെ ഗവേഷക സംഘത്തിന് നൽകിയിട്ടുണ്ട്. വിദ്യാർത്ഥികൾക്കും അധ്യാപകർക്കുമായി 2024 ന്റെ ആദ്യപാദത്തിൽ 24 പേറ്റന്റുകൾ ലഭിക്കുകയും 8 പേറ്റന്റുകൾക്കുള്ള നടപടികൾ പൂർത്തിയാക്കുകയും ചെയ്തിട്ടുണ്ട്. കൂടാതെ ഇതുവരെ 8 സ്റ്റാർട്ട് അപ്പുകളും തുടങ്ങിയിട്ടുണ്ട്. വിദ്യാര്ഥികളിൽ ഗവേഷണവും കണ്ടുപിടിത്തവും പ്രോത്സാഹിപ്പിക്കാൻ സ്റ്റുഡൻ്റ് ഇന്നൊവേറ്റീവ് പ്രോജക്ട് ഫണ്ടിംഗ് സ്കീമിലൂടെ വിദ്യാർത്ഥികൾക്ക് സാമ്പത്തിക സഹായവും നൽകുന്നു. പുതുതായി ചേർന്ന 75 അധ്യാപകർക്ക് ലാബുകൾ സ്ഥാപിക്കുന്നതിനോ അവരുടെ ഗവേഷണം തുടരുന്നതിനോ വേണ്ടി 5 ലക്ഷം രൂപ വീതം ഗവേഷണ ഗ്രാൻ്റുകൾ നൽകിയിട്ടുണ്ടെന്നും പ്രൊഫ. സന്ധ്യാറാണി പറഞ്ഞു.
