നടി ഗൗരി കിഷനെതിരായ ബോഡി ഷെയ്മിങ് പരാമർശത്തെ ന്യായീകരികരിച്ച് യൂട്യൂബർ. നടിയുടെ പ്രതികരണം പിആർ സ്റ്റണ്ട് എന്നും
മാപ്പ് പറയില്ലെന്നുമാണ് യൂട്യൂബർ ആർ.എസ് കാർത്തികിന്റെ പ്രതികരണം. തെറ്റായി ഒന്നും ചോദിച്ചിട്ടില്ലെന്നും ട്രംപിനെ കുറിച്ചോ, മോദിയെ കുറിച്ചോ സ്റ്റാലിനേ കുറിച്ചോ ഇവരോട് ചോദിക്കാൻ ആകുമോയെന്നും യൂട്യൂബർ ചോദിക്കുന്നു.
നായിക നായകനെ ആണ് എടുത്തത് എങ്കിൽ നായകൻ്റെ ഭാരത്തെ കുറിച്ച് നായികയോട് ചോദിച്ചേനെ എന്ന് യൂട്യൂബർ പറയുന്നു. വാർത്താ സമ്മേളനത്തിനിടെ നടിയുടെ ഭാരം എത്രയെന്ന യൂട്യൂബറുടെ ചോദ്യത്തിനോട് ഗൗരി കിഷൻ രൂക്ഷമായാണ് പ്രതികരിച്ചിരുന്നത്. നടിയെ പിന്തുണയ്ക്കാതിരുന്ന സംവിധായകൻ അബിൻ ഹരിഹരനും നടൻ ആദിത്യ മാധവനുമെതിരെ സമൂഹമാധ്യമങ്ങളിൽ വിമർശനം ശക്തമാണ്. അദേഴ്സ് എന്ന സിനിമയുടെ പ്രമോഷനുമായി ബന്ധപ്പെട്ട് ചെന്നൈയിൽ നടന്ന വാർത്താ സമ്മേളനത്തിനിടെയായിരുന്നു സംഭവം.
സിനിമയെ കുറിച്ചോ കഥാപാത്രത്തെക്കുറിച്ചോ ഒരു ചോദ്യം പോലും ഉന്നയിച്ചില്ല. ഒരു നടനോടാണെങ്കിൽ ഇത്തരം ചോദ്യങ്ങൾ ഉണ്ടാകുമോ എന്നും ഗൗരി കിഷൻ ചോദിച്ചു. എന്നാൽ ചോദ്യത്തെ യൂട്യൂബർ ന്യായീകരിച്ചു. ഗൗരിയെ പിന്തുണച്ച് ഗായിക ചിന്മയി ഉൾപ്പെടെ നിരവധിപേർ രംഗത്തെത്തി. ആരാണെങ്കിലും എവിടെയാണെങ്കിലും ബോഡി ഷേമിങ് ചെയ്യുന്നത് തെറ്റാണെന്നും ഗൗരിക്കൊപ്പമെന്നും അമ്മ സംഘടന വ്യക്തമാക്കി.
