പശ്ചിമ ബംഗാൾ ഗവർണർ പദവി രാജിവയ്ക്കാനുണ്ടായ യഥാർത്ഥ കാരണം ഉചിതമായ സമയത്ത് വെളിപ്പെടുത്തുമെന്ന് ഡോ. സി വി ആനന്ദബോസ് വ്യക്തമാക്കി. കൊൽക്കത്ത വിമാനത്താവളത്തിൽ മാധ്യമങ്ങളോട് സംസാരിക്കവെ, തന്റെ തീരുമാനം ബോധപൂർവമാണെന്നും അതിന്റെ രഹസ്യം തത്കാലം സൂക്ഷിക്കുമെന്നും അദ്ദേഹം പറഞ്ഞു. ഗവർണർ പദവിയിൽ താൻ ചെലവഴിച്ച 1,200-ൽ പരം ദിവസങ്ങളെ ക്രിക്കറ്റിലെ “12 സെഞ്ച്വറികളോട്” ഉപമിച്ച അദ്ദേഹം, ഏതൊരു കളിക്കും കൃത്യമായ എക്സിറ്റ് ഉണ്ടെന്നും അത് തിരിച്ചറിഞ്ഞാണ് താൻ പടിയിറങ്ങുന്നതെന്നും കൂട്ടിച്ചേർത്തു.
മൂന്ന് വർഷത്തെ കാലാവധി ബാക്കിനിൽക്കെയാണ് ആനന്ദബോസ് അപ്രതീക്ഷിതമായി രാജിവച്ചത്. ബിജെപി നേതൃത്വവുമായുള്ള ഭിന്നതയാണ് ഇതിന് പിന്നിലെന്ന അഭ്യൂഹങ്ങൾ നിലനിൽക്കുന്നുണ്ടെങ്കിലും അദ്ദേഹം അത് സ്ഥിരീകരിച്ചിട്ടില്ല. അതേസമയം, താൻ ബംഗാളിലെ വോട്ടറാണെന്നും വരാനിരിക്കുന്ന നിയമസഭാ തെരഞ്ഞെടുപ്പിൽ അവിടെ വോട്ട് ചെയ്യുമെന്നും അദ്ദേഹം വ്യക്തമാക്കി. ആനന്ദബോസിന്റെ പെട്ടെന്നുള്ള രാജിയിൽ അന്വേഷണം വേണമെന്ന് പശ്ചിമ ബംഗാൾ മുഖ്യമന്ത്രി മമത ബാനർജി ആവശ്യപ്പെട്ടിട്ടുണ്ട്.
മാർച്ച് അഞ്ചിനാണ് ആനന്ദബോസ് ഔദ്യോഗികമായി സ്ഥാനമൊഴിഞ്ഞത്. ഇതിനെത്തുടർന്ന് തമിഴ്നാട് ഗവർണറായിരുന്ന ആർ.എൻ. രവിയെ പശ്ചിമ ബംഗാളിന്റെ പുതിയ ഗവർണറായി നിയമിച്ചു. നിയമസഭാ തെരഞ്ഞെടുപ്പിന് മുന്നോടിയായി അദ്ദേഹം ചുമതലയേൽക്കുമെന്നാണ് റിപ്പോർട്ടുകൾ. പശ്ചിമ ബംഗാൾ രാഷ്ട്രീയത്തിൽ വലിയ ചർച്ചകൾക്ക് വഴിതെളിച്ച ഈ മാറ്റം ബജറ്റ് സമ്മേളനത്തിന്റെ രണ്ടാം ഘട്ടം ആരംഭിക്കുന്ന വേളയിലാണ് സംഭവിച്ചിരിക്കുന്നത്.
